Rusiyanın məşhur MMA idmançısı Aleksandr Yemelyanenko İslamı qəbul edib.

Publika.az xəbər verir ki, bu barədə Vladimir Mineyev və Roman Kopilovun məşqçisi Rəsul Maqomedəliyev məlumat verib. Mütəxəssis bildirib ki, 42 yaşlı rusiyalı artıq Mədinədə olub.

“Bütün müsəlmanlar ora gedir. Ona görə də onun İslamı qəbul etdiyi dəqiqdir”, - Maqomedəliyev Sport24-ə müsahibəsində deyib.

O, Aleksandra alkoqol asılılığını aradan qaldırmağa kimin kömək etdiyini də qeyd edib:

“İnquş qardaşlarımız onu ayağa qaldırdılar... Və ümid edirəm ki, bir daha buna qayıtmayacaq”.

Aleksandr Yemelyanenko döyüş sambosu üzrə dəfələrlə Rusiya, dünya və Avropa çempionu olub. Rusiyalı idmançı peşəkar MMA-da 40 döyüş keçirib, 29-da qalib gəlib (20-si nokautla), 10 dəfə uduzub və bir döyüşü heç-heçə başa vurub.

Rusiya mətbuatı xəbər verir ki, 2023-cü ilin yayından 42 yaşlı Yemelyanenko İnquşetiyanın reabilitasiya mərkəzində alkoqol asılılığından müalicə alıb.

2024-cü ilin əvvəlində idmançının Səudiyyə Ərəbistanında müsəlmanların müqəddəs Mədinə şəhərinə səfər etdiyi məlum olub. Sosial şəbəkələrdə onun ərəbcə Abubakar adını seçdiyi video yayılıb. Onun özü bu məsələ ilə bağlı ictimaiyyətə açıqlama verməyib.