“Qarabağ” bu gün UEFA Avropa Liqasının pley-off mərhələsində ilk matçına çıxacaq.

Publika.az xəbər verir ki, Qurban Qurbanovun baş məşqçisi olduğu komanda Azərbaycan futbolunun tarixində ilk dəfə bu mərhələdə mübarizə aparacaq. Təmsilçimiz Portuqaliyada “Braqa”nın qonağı olacaq.

Bu görüşə komandalar ciddi itkilərlə çıxacaq. Ağdam təmsilçisinin liderlərindən biri olan Kevin Medina ötən ilin sonlarında aldığı zədəni hələ də sağalda bilməyib. Onun bir həftə sonra Bakıda keçiriləcək cavab oyununda da iştirak etməyəcəyi dəqiqdir. Marko Veşoviç isə cəzalı olduğu üçün meydana çıxmayacaq.

Portuqaliya təmsilçisində isə ulduz futbolçu Bruma ilə yanaşı Adrian Marinin zədə səbəbindən bu görüşdə iştirak etməyəcəyi dəqiqdir. Fiziki problemlər yaşayan kapitan Rikardo Hortanın durumuna isə oyun saatında aydınlıq gələcək.

Görüş Bakı vaxtı ilə saat 00:00-da başlanacaq. Matçın baş hakimi Danimarkadan olan Morten Kroq olacaq.

Qeyd edək ki, tərəflər arasında cavab görüşü fevralın 22-də Tofiq Bəhramov adına Respublika stadionunda gerçəkləşəcək.

UEFA Avropa Liqası: 1/8 final, ilk oyunlar
15 fevral
00:00 Braqa – Qarabağ
Baş hakim: Morten Kroq (Danimarka)
Braqa, “Estadio Municipal de Braga”

Heybət