Rusiya Federasiyası iyulun 1-dən bir ay müddətinə BMT Təhlükəsizlik Şurasının sədri olacaq.

Publika.az xəbər verir ki, bu barədə "RİA Novosti" məlumat yayıb.

Rusiya Federasiyasının BMT-dəki daimi nümayəndəsi Vasili Nebenzyanın verdiyi məlumata görə, Rusiya sədrliyi dövründə üç əsas tədbir planlaşdırıb.

Söhbət daha ədalətli, demokratik və davamlı dünya nizamının qurulması üçün çoxtərəfli əməkdaşlığa dair açıq müzakirələrdən gedir. Bu görüşdə Rusiya tərəfi xüsusilə yeni qlobal “təhlükəsizlik tənliyi” məsələsinə toxunacaq. Tədbir iyulun 16-na planlaşdırılıb.

İyulun 17-də Yaxın Şərq nizamlanması məsələlərinə dair açıq müzakirələr aparılmalıdır.

İyulun 19-da Rusiya sədrliyinin üç əsas tədbirindən biri - BMT və regional təşkilatlar, yəni KTMT, MDB və ŞƏT arasında əməkdaşlığa dair Təhlükəsizlik Şurasının müzakirəsi planlaşdırılır.

Bundan əlavə, Rusiyanın sədrliyi zamanı Ukrayna Silahlı Qüvvələrinin (AFU) Amerikanın ATACMS raketlərindən istifadə edərək Sevastopol çimərliyinə raket zərbəsi endirməsi də müzakirə edilə bilər.

İyun ayında Birləşmiş Millətlər Təşkilatının Baş katibi Antonio Quterreş bildirmişdi ki, Rusiya Federasiyası BMT-nin fəaliyyətinin fundamental əsası olaraq qalır.

Bundan əvvəl Putin Rusiyanın BMT-dən çıxması ideyasına qarşı çıxıb.

Hüseyn İbadlı