Almaniyanın ən çox oxunan qəzetlərindən olan “Bild”in xəbərində ölkənin Müdafiə Nazirliyinin sənəd layihəsinə əsaslanaraq, Avropada böyük bir müharibə olacağı təqdirdə almanların evlərini bomba sığınacağına çevirəcəyi açıqlanıb.

Publika.az xəbər verir ki, nazirlik məxfi “Əməliyyat planı” üzrə işləri aprel ayına qədər yekunlaşdırmağa hazırlaşır. Hesabatda Almaniya fəal cəbhə xətti olan bir dövlət deyil, silah və texnikanın çatdırılması üçün həyati əhəmiyyət kəsb edən “tranzit ölkə” kimi nəzərdə tutulur.

Buna görə də əsgərlərə mühüm magistralların, qatar stansiyalarının və limanların təhlükəsizliyini təmin etmək tapşırılacaq.

Məlumata görə, hərbiçi və polisə tapşırılan bəzi vəzifələr mülki şəxslər tərəfindən icra olunacaq. Almaniyada yalnız 579 funksional bomba sığınacağı olduğundan, zirzəmilər və qarajların sığınacaq kimi istifadə olunacağı nəzərdə tutur.

Federal Mülki Mühafizə və Fəlakətlərə Yardım Agentliyinin rəhbəri Ralf Tisler deyib ki, yeni sığınacaqlar tikmək vaxt məhdudiyyəti səbəbindən artıq mümkün deyil.

Almaniya davam edən Rusiya-Ukrayna münaqişəsindən qaynaqlanan təhdidləri əsas gətirərək ordusunu gücləndirmək yollarını axtarır.

Aysel Şahmar