Bu ilin yanvar-mart aylarında Bakıda 3, 4 və 5 ulduzlu hotellər üzrə onlayn bronlaşdırma sistemi olan booking.com-da qeyd olunan orta qiymətlər açıqlanıb.

Dövlət Turizm Agentliyinin məlumatına görə, 3 ulduzlu hotellərdə bir gecə qalmaq üçün orta qiymət 75 manat, 4 ulduzlu hotellərdə orta qiymət 108,6 manat, 5 ulduzlu hotellərdə isə 236, 9 manat təşkil edib.

Qiymətlər, ötən ilin eyni dövrü ilə müqayisədə 3 ulduzlu hotellər üzrə 33 %, 4 ulduzlu hotellər üzrə 30 % azalıb, 5 ulduzlu hotellər üzrə isə 25 % artıb.

Qiymətlərin artma səbəbi nədir?

Bu barədə turizm eksperti Ceyhun Aşurov Qütb.az-a açıqlama verib. O bildirib ki, yanvar-mart aylarında Bakı şəhərində ümumi otellərin doluluq səviyyəsi aşağı olub:

"Bu daha çox 3 və 4 ulduzlu otellərə təsir edib. Biz onlayn platformalardan da qiymətlərin çox aşağı olduğunu görürük. Amma bunun əksinə olaraq ölkəyə gələn turist seqmentinə nəzər salsaq, 5 ulduzlu otellərə daha çox tələbatın olduğunu görürük. Yaxud da 5 ulduzlu otellər ölkəyə gələn turizm seqmenti üçün eyni ekvivalentdə daha əlverişli görünür. Çünki, həqiqətən də, Azərbaycanda olan 5 ulduzlu otelləri digər ölkələrin 5 ulduzlu otelləri ilə müqayisə etdikdə əslində manat hesabından valyutaya çevirdikdə bizim qiymətlər daha əlverişli hesab olunur. Ona görə xaricdən gələn müəyyən turist kütləsi də, hansı ki onlar 5 ulduzlu otellərə daha çox üstünlük verirlər, onlar qiymətləri əlverişli hesab edirlər".

Ekspertin sözlərinə görə, tələbat 5 ulduzlu otellərə olduğu üçün biz orada bu ilin ilk ayında keçən illə müqayisədə qiymətlərin daha çox artdığını görə bilirik. Lakin 3 və 4 ulduzlu otellər isə qiymətləri artıra bilməyiblər:

"Baxmayaraq ki, onların əvvəlki ilə nisbətən müəyyən xərcləri artıb. Qiymətlərin artması yalnız Bakı şəhərində olan 5 ulduz otellərə aiddir. Onların daha çox tədbiri, turist qruplarını almaq imkanları var. Bu mənada həmin otellər daha çox manevr etmək, qiymətləri artırmaq imkanlarına sahib olublar. 3 və 4 ulduz otelləri şəhər mərkəzində daha azdır. Şəhərin içində və kənarda daha çox olduğuna görə ora gələn turistlərin sayı da az olub. Sayın çoxluğu da bu rəqabətə öz təsirini göstərir və nisbətən orda həmin kateqoriyadan olan otellər qiymətlərini müəyyən qədər endirməyə məcbur olublar. Hətta bəzən elə 3 və 4 ulduzlu otellərə rast gəlirik ki, səhər yeməyinin qiyməti 30-50 manat civarında olur. 

Bütün bunlar mövsümlə əlaqədardır. Yanvar-fevral ayı nisbətən daha sakit aydır. Mart ayı əvvəlki illərdə hərəkətli olmağına baxmayaraq, bu il Ramazan ayına təsadüf etdiyi üçün müəyyən körfəz ölkələrindən gələn qruplara və ya individual qonaqların səyahət qərarlarına təsir etdi. Mart ayında da əslində Bakı şəhərində doluluq regionlara nisbətən daha az oldu. Bütün bunlar da qiymətlərə öz təsirini göstərir".