“Mançester Siti”nin yarımmüdafiəçisi Cek Qrilişin ailəsi Premyer Liqanın son turunda keçirilən “Everton”la oyun zamanı insidentlə üzləşib.

Publika.az xəbər verir ki, İngiltərə millisinin üzvünün mənzilinə basqın edilib. Bu barədə "The Sun" məlumat yayıb.

Futbolçunun valideynləri, nənəsi, iki bacısı, qardaşı və nişanlısı televizorda matça baxarkən itlər hürüb. Qohumlar çaxnaşma düyməsini basmağı bacararaq sığınacağa eniblər. Polisin siqnala cəld reaksiya verməsinə və hətta vəziyyəti havadan öyrənmək üçün mülki helikopter göndərməsinə baxmayaraq, quldurlar içəri girərək təxminən 1 milyon funt-sterlinq dəyərində qızıl-zinət əşyalarını apara biliblər.

Mənbənin sözlərinə görə, matçdan bir neçə dəqiqə sonra oğurluq barədə futbolçunun özünə məlumat verilib. Hazırda istintaq davam edir, polis hadisəni törədənləri hələ də tapmayıb.

Əlavə edək ki, Qriliş "Çesşr"də yerləşən bu mülkü 2022-ci ilin payızında 6 milyon funt sterlinqə alıb. Mülkün yeddi yataq otağı, üzgüçülük hovuzu, qonaq otağı və idman zalı var və ərazidə dəbdəbəli bağ, balıqçılıq gölü, tennis kortu, qolf meydançası və hətta şərab anbarı da mövcuddur.

Heybət