Deklan Rays yay transfer pəncərəsində 105 milyon funt sterlinqə (təqribən 116.6 mln avro) "Vest Hem"dən "Arsenal"a transfer olundu. O, qısa zamanda komandanın onurğa sütununa çevrildi.

Dayaq yarımüdafiəçisi olmasına rəğmən, o, "topçular"ın mərkəz xəttinin əsas simasına çevrilib. Həm arxa xəttə kömək edir, həm də hücumlara qoşulur. Təsadüfi deyil ki, meydana çıxdığ 28 Premyer Liqa oyunda 6 qol və 5 məhuldar ötürmə ilə yadda qalıb. 25 yaşlı futbolçu İngiltərə millisinin də aparıcı üzvlərindən biridir.

Sakit xarakteri və çalışqanlığı ilə adı nümunəvi futbolçular sırasında göstərilir. Bu günlərdə Deklan şəxsi həyatı ilə gündəmə gəlib. Paparazzilər Raysın xanımı ilə yaxtada istirahət edərkən fotolarını çəkiblər.

Onlar bir-birlərini məktəbdən tanıyırlar. 17 yaşları olanda evləniblər. 2022-ci ilin avqustunda cütlüyün Cud adlı oğul övladı dünyaya gəlib. Deklan hətta qoluna Cud (Jude) adını, 7 avqust (doğum tarixi) və şir bürcünü döymə etdirib.

Lauren müntəzəm olaraq həyat yoldaşının oyunlarında tribunalarda görünür. Ulduzluq, şan-şöhrət və artan maaş Raysın sadiqliyinə təsir etmir. O, matçlar arasında asudə vaxtını həyat yoldaşı ilə keçirir.

Onun xanımı sosial şəbəkələrdən istifadə etmir. Bir müddət əvvəl "İnstaqram"da 40 minə yaxın abunəçisi olan səhifəsi var idi. Lakin paylaşım etdiyi şəkilləri silib və profilini bağlayıb.

Heybət