"Moskva və Bakı Rusiyanın Azərbaycanda baş konsulluqlarının yaradılmasını müzakirə edir. Rusiya Federasiyası bu məsələdə uğur qazanacağına ümid edir".

Publika.az TASS-a istinadla xəbər verir ki, bunu Rusiya Federasiyası xarici işlər nazirinin müavini Mixail Qaluzin Sankt-Peterburq Beynəlxalq İqtisadi Forumu (SPİEF) çərçivəsində keçirilən “Rusiya - Azərbaycan” sessiyasında deyib.

“Qeyd etmək istərdim ki, əlaqələrimizin mütərəqqi inkişafı, o cümlədən ticarət-iqtisadi əməkdaşlığın inkişafı üçün yeni imkanların axtarışı Azərbaycanda baş konsulluqlarımızın yaradılmasına uyğun olardı. Biz indi azərbaycanlı dostlarımızla bu söhbəti edirik və ümid edirik ki, bu söhbət də uğurlu olacaq.”, - deyə nazir müavini bildirib.

Qaluzin Rusiya-Azərbaycan münasibətlərinin bu gün əla olduğunu vurğulayıb.

"Bunlar 2022-ci ilin fevralında imzalanmış bəyannaməyə uyğun olaraq müttəfiqlik qarşılıqlı fəaliyyət və strateji tərəfdaşlıq münasibətləridir", - deyə o əlavə edib.

Rusiya XİN rəhbərinin müavini Azərbaycanda rus dilinin öyrənilməsi məsələsinə də diqqət çəkib:

"Dünən Vladimir Vladimiroviç Putin bildirib ki, rus dilinin öyrənilməsi məsələlərində Azərbaycan prezidentinin dəstəyini hiss edir, çünki bu, ikitərəfli münasibətlərin inkişafı üçün vacibdir. Bu, həm də bizim birgə işimizin vacib hissəsidir, biz bunu birlikdə həyata keçiririk, burada yeni imkanlar tapırıq və bu məsələləri çox fəal müzakirə edirik".

“Əminəm ki, biz bu yolla getsək, Rusiya-Azərbaycan münasibətlərinin ən uğurlu, etibarlı və praqmatik inkişafı liderlərimizin razılaşmalarına uyğun olaraq fəal şəkildə davam etdiriləcəkdir”, - deyə nazir müavini yekunlaşdırıb.

Qeyd edək ki, iyunun 5-dən 8-dək Sankt-Peterburq Beynəlxalq İqtisadi Forumu keçirilir.

Hüseyn İbadlı