“Ermənistanın Beynəlxalq Cinayət Məhkəməsinə (BCM) qoşulması onun suveren məsələsidir və bunun Moskva ilə İrəvan arasında münasibətlərə mənfi təsir göstərməməsi Rusiya üçün vacibdir”.

Publika.az xəbər verir ki, bunu Rusiya prezidentinin mətbuat katibi Dmitri Peskov jurnalistlərə açıqlamasında deyib.

“Burada şərh ediləcək heç nə yoxdur. Ümumiyyətlə, bu, Ermənistanın suveren hüququdur”, - Kreml nümayəndəsi bildirib. “Ancaq digər tərəfdən, bizim üçün vacibdir ki, bu cür qərarlar həm de-yure, həm də de-fakto dəyər verdiyimiz və inkişaf etdirməyə çalışdığımız əlaqələrimizə mənfi təsir göstərməsin”, - deyə o vurğulayıb.

Fevralın 1-də Ermənistan əvvəllər Roma Nizamnaməsinin ratifikasiyasını təsdiq edən sənədləri təşkilata rəsmən təqdim edərək BCM-nin 124-cü tamhüquqlu üzvü olub. BCM-dən bildirilib ki, İrəvan həmçinin “Ermənistanın 2021-ci il mayın 10-dan məhkəmənin yurisdiksiyasını retroaktiv olaraq qəbul etdiyini” təsdiqləyən sənədləri də verib.