ABŞ prezidenti Co Baydenin noyabrın 5-də keçiriləcək prezident seçkilərində namizədliyini geri götürməsi Hollivud dünyasında müxtəlif reaksiyalara səbəb olub.

Publika.az xəbər verir ki, Hollivud dünyasının bəzi məşhur adları Baydenin namizədlikdən geri çəkilməsinə kədərləndiklərini bildiriblər. Digərləri isə vitse-prezident Kamala Harrisin namizədliyini dəstəklədiyini bildirib.

Amerikalı bəstəkar, müğənni, aktrisa və rejissor Barbra Streisand Baydenin geri çəkilməsi ilə bağlı öz sosial şəbəkə hesabında paylaşım edib:

“Bayden 4 illik səlahiyyət müddətində əhəmiyyətli uğurlar qazanan bir şəxs kimi tarixə düşəcək. Buna görə ona təşəkkür edirəm”.

Tanınmış müğənni Billie Alishin qardaşı O'Connell sosial media hesabında ailəsinin Baydenlə çəkdirdiyi şəkli paylaşıb.

“Ulduz Döyüşləri” filminin ulduzu Mark Hamill “X” sosial media hesabındakı paylaşımında Baydenə təşəkkür edib: “Bayden heç bir prezidentin əldə etmədiyi uğurlara imza atıb”, -deyə əlavə edib.

“Bozun anatomiyası” və “Qalmaqal” seriallarının prodüseri, ssenaristi və rejissoru Şonda Rhimes Baydenə xidmətlərinə görə təşəkkür edib.

Amerikalı müğənni və aktrisa Cher “X” hesabındakı paylaşımında Baydenin geri çəkilməsinə görə kədərləndiyini bildirib.

Digər tərəfdən, bir çox sənətçi vitse-prezident Kamala Harrisin namizədliyini dəstəkləyib.

Aktrisa Keti Qriffin “X” sosial media hesabında yazdığı paylaşımda Harrisə dəstəyini bildirib: “Nəhayət, tarix yazaq!”,- deyə paylaşım edib.

Oskar mükafatlı rejissor Spike Li Harrisin şəklini "bacı köməyə gəlir" sözləri ilə paylaşıb.

Aktrisa Ceymi Li Kertis də Harrisin fotosunu paylaşaraq dəstək mesajı verib.

Aysel Şahmar