Ən böyük fayl hostinq xidməti "Megaupload"un keçmiş sahibi, biznesmen Kim Dotkom bildirib ki, ABŞ-ın hazırkı prezidenti Co Bayden və Respublikaçılar Partiyasının namizədi Donald Tramp arasında keçirilən seçki debatı ABŞ-ın qaçılmaz çöküşünü göstərib.

Publika.az xəbər verir ki, o, "X" sosial şəbəkəsindəki səhifəsində ölkənin dağılacağını proqnozlaşdırıb.

“Dünən debatı izləyənlər təkcə amerikalılar deyildi. Bütün dünya onlara baxırdı. İmperatorluğun sonu yaxınlaşır”, - deyə Dotkom bildirib.

O, həmçinin əmindir ki, bu hadisədən sonra ABŞ hökumətinin reputasiyası tamamilə aşağı düşüb və bundan sonra əvvəlki səviyyəsinə qayıda bilməyəcək. Onun sözlərinə görə, Vaşinqtonun proksi müharibələri, fasiləsiz təbliğatı ölkəni fəlakətə aparacaq.

Qeyd edək ki, elə həmin gün səhər saatlarında amerikalı Konstantin Bloxin Donald Trampın prezident olacağı təqdirdə ABŞ-ın Ukrayna siyasətinin dəyişib-dəyişməyəcəyini qiymətləndirib. O, həmçinin Trampın debatda qalib gəlməsinin təbii olduğunu və Bayden komandasının istifadə etdiyi üsulların kömək etmədiyini qeyd edib.

Adəm Abbaslı