ABŞ Konqresində keçirilən səsvermə 150 ildən sonra bir ilkə səbəb olub. Parlament bir nazirin vəzifəsindən azad edilməsini tələb edərək, onun impiçment edilməsi barədə qərar qəbul edib.
Publika.az xəbər verir ki, Respublikaçıların çoxluq təşkil etdiyi Nümayəndələr Palatasında ABŞ Milli Təhlükəsizlik naziri Alejandro Mayorkas üçün səsvermə keçirilib. 213 səsə qarşı 214 səslə Mayorkasın impiçment edilməsi qərara alınıb.
Daxili Təhlükəsizlik Katibi Mayorkas ölkənin cənub sərhədində baş verən qeyri-qanuni miqrasiya böhranına görə tənqidlərə məruz qalıb.
Nazirin işdən çıxarılması ehtimalı azdır. Mayorkasın impiçment edilməsi üçün Senatın üçdə ikisi onun mühakimə olunmasına səs verməlidir.
Bayden administrasiyası uzun müddətdir ki, qeyri-qanuni immiqrasiya və sənədsiz immiqrant böhranı ilə bağlı ciddi tənqidlərə məruz qalıb.
Roza Şəfiyeva
