Türkiyədə İstanbul Hava Limanından istifadə edərək Meksika, Panama, Kolumbiya və Venesuelaya tranzit yolla səyahət edəcək 10 ölkənin vətəndaşları üçün elektron hava limanı tranzit vizası məcburiyyəti tətbiq olunub.
Publika.az xəbər verir ki, bu, qlobal səviyyədə qeyri-qanuni miqrasiya halları ilə bağlı həm tranzit, həm də təyinat ölkəsi olan Türkiyənin bu hallarla mübarizə çərçivəsində aldığı qərarlardan biridir.
Son dövrlər Türkiyə üzərindən tranzit hava yolu imkanlarından istifadə edərək müxtəlif Mərkəzi və Latın Amerikası ölkələri vasitəsilə Şimali Amerikaya gedən qeyri-qanuni mühacirlərin sayının artması ilə əlaqədar beynəlxalq aviasiya qaydaları çərçivəsində yoxlamalar artırılıb.
15 aprel tarixindən etibarən İstanbul Hava Limanından istifadə edərək Meksika, Panama, Kolumbiya və Venesuelaya tranzit keçəcək Hindistan, Əfqanıstan, Nepal, Burkina-Faso, Qvineya, Çad, Somali, Kamerun, Mavritaniya və Yəmən vətəndaşları elektron hava limanı tranzit vizası almaq məcburiyyətindədirlər.
