Malayziyada BRİKS tərəfdaşı olmaq üçün razılıq əldə edilib.

QÜTB.AZ xəbər verir ki, bu barədə ölkənin Moskvadakı səfiri Çeonq Lun Lai TASS-a məlumat verib.

Diplomatın sözlərinə görə, ölkə hakimiyyəti noyabrın ortalarında rəsmi dəvət alıb.

“Biz BRİKS-in sədri olan Rusiyaya cavab verdik ki, biz bu assosiasiyanın bir hissəsi olmağa razıyıq”, - deyə Çeonq Lun Lai bildirib.

Oktyabrda Rusiya Prezidentinin köməkçisi Yuri Uşakov bildirmişdi ki, 15 dövlət BRİKS-in tərəfdaş ölkəsi hesab olunur. Onun sözlərinə görə, bu ölkələr müxtəlif yollarla, məsələn, regional və beynəlxalq məsələlərə təsir etməkdə tərəfdaş ola bilərlər.

Uşakov qeyd edib ki, birdən-birə bu qədər çox ölkəni qəbul etmək məntiqsiz olardı, çünki bu halda təşkilat disfunksiyalı və “tamamilə amorf struktur” olacaq.

Sentyabrın 5-də Rusiya Prezidenti Vladimir Putin bildirib ki, 30-dan çox dövlət BRİKS ilə əməkdaşlığa maraq göstərir, bəziləri assosiasiyaya qoşulmaq arzusundadır.

Hüseyn İbadlı