Litva Futbol Federasiyasının prezidenti Edqaras Stankeviçyus bildirib ki, Litvanın qadınlardan ibarət milli komandası 2025-ci il Avropa çempionatının seçmə turnirində Belarus millisi ilə oynamayacaq.

Publika.az xəbər verir ki, Stankeviçyusun sözlərinə görə, federasiya Avropa Futbol Assosiasiyaları İttifaqının (UEFA) milli komandaya iki texniki məğlubiyyət verməsinə hazırdır:

“İdman komponentindən danışsaq, püşkatma kifayət qədər əlverişlidir. Hər üç komandanı məğlub etmək olar, lakin biz Belarusla oynamağı planlaşdırmırıq. Çox ümid edirəm ki, sanksiyalar 0:3 hesablı texniki məğlubiyyətlə məhdudlaşacaq və qızlarımız seçimdə iştirakını davam etdirəcəklər. Onlar qrupda ikinci yer və növbəti mərhələyə vəsiqə uğrunda mübarizə apara bilirlər. Mənim üçün ən önəmlisi diskvalifikasiya edilməməyimizdir. Bu, ən ağrılı variant olardı”.

Litva qadınlardan ibarət milli komandasının kapitanı və yerli futbol assosiasiyasının baş direktoru Milda Lujinite millinin Belarusla oynamaqdan imtina edəcəyini təsdiqləyib. “Hətta bu iki matç olmasa belə, qrupda ikinci yeri tuta bilərik”, - deyə Lujinite bildirib.

Qeyd edək ki, bu həftə qadınlar arasında 2025-ci il Avropa çempionatının seçmə turnirinin püşkatma mərasimi keçirilib. Belarus və Litva C Liqasının birinci qrupunda Kipr və Gürcüstanla birlikdə yer alıb.

Heybət