"Paris Saint-Germain" (PSJ) və Fransa millisinin futbolçusu Kilian Mbappenin anası Faiza Lamari "Real Madrid" rəhbərliyi ilə münaqişəyə düşüb.
Publika.az xəbər verir ki, bu barədə “Marca” məlumat yayıb.
Nəşrin məlumatına görə, forvardın agenti kimi fəaliyyət göstərən Lamari futbolçunun özünün buna hazır olmasına baxmayaraq, güzəştə getmək istəmir. Qeyd olunur ki, “Real” transferi yalnız öz şərtləri ilə təşkil etmək istəyir.
Fevralın 3-də “Le Parisien” 25 yaşlı fransızın 2024-cü ilin yayında azad agent kimi “Real Madrid”ə keçəcəyini yazıb. Sonradan məlumat olub ki, müqavilənin razılaşdırılmasında çətinliklər üzündən sövdələşmə pozula bilər.
Bu mövsüm Mbappe Fransa çempionatının 19 matçında iştirak edib, o, 20 qol (beşi penaltidən) vurub və dörd məhsuldar ötürmə edib. PSJ 50 xalla turnir cədvəlində birinci yerdədir.
