“Mançester Yunayted”in baş məşqçisi Erik ten Haq, “İneos”un direktorlar şurasına sədrlik edən milyarder Cim Ratkliffin klubdakı 25%-lik payı alması fonunda “qırmızı şeytanları” böhrandan çıxarmaq üçün düzgün məşqçi olub-olmaması ilə bağlı sualı cavablandırıb.

“Əlbəttə ki, onlar (INEOS ) məni tanıyırlar və bilirlər ki, bütün zədəli oyunçular mənim üçün əlçatan olduqda, nəticələr olacaq. Artıq yüksək səviyyəli komandalarla matçlarda sübut etmişik ki, onlarla eyni səviyyədə oynaya bilərik.

Mən əminəm və qəti şəkildə inanıram ki, biz bu komandada irəliləyişə nail ola bilərik.

Keçən il əla nəticələr göstərdik. Bu il biz geridəyik və daha yaxşı işləməliyik.

Bilirəm ki, zədəli oyunçular qayıdanda bu komanda daha güclü olacaq”, – ESPN Ten Haqdan sitat gətirib.

Xatırladaq ki, “Mançester Yunayted” Premyer Liqada yeddinci yerdədir. “Qırmızı şeytanlar”ın 20 oyunundan 31 xalı var.