Viktor Ponedelnik elə əfsanə olub ki, onsuz sovet futbolunu təsəvvür etmək mümkün deyil. Görkəmli hücumçu, Avro-1960-da SSRİ millisinə qızıl medal qazandırıb. Turnirin finalında qələbə qolunu vurub.

Növbəti Avropa çempionatında komandasına "gümüş" qazanmağa kömək edib. Həmçinin karyerası boyunca sadiq qaldığı Rostov SKA-sını şöhrətləndirib.

Peşəkar futbolda keçirdiyi 11 il ərzində Ponedelnik bütün yarışlarda, o cümlədən milli komanda səviyyəsində 107 qol vurub. Lakin forvard bu qolların heç birini penaltidən vurmayıb. İndi müasir hücumçulara qəribə görünə bilər, lakin Viktor 11 metrlik zərbələr haqqında fərqli fikirlərə sahib idi. O, bunu ədalətsiz hesab edib, ona görə də karyerası boyu penaltidən imtina edib.

“Rostovda məşqçi kimin zərbə vurduğunu deməyib. Hətta milli komandada da Kaçalindən eşitmədim, çünki onsuz da hamı hər şeyi bilirdi. Hər komandanın inadkar penalti vuranları var idi. Adətən oyunçu bomabrdirlər arasında oolurdusa, bir qayda olaraq penaltini onun vurmasına icazə verirdilər. Amma mən onu heç vaxt istəməmişəm. Bunun edam olduğunu düşünürdüm. Qapıçıya yazığım gəlirdi. Mən balıqçıyam, amma ovçu deyiləm. Baxmayaraq ki, mənim fərdiləşdirilmiş Tula silahım var. Müdafiəsiz heyvana atəş edə bilmərəm”- deyə Ponedelnik bildirib.

Viktorun bu mövqeyinə müxtəlif aspektlərdən baxmaq olar. Yəqin kimsə deyəcək: “Bu, sadəcə bir oyundur. Penaltini yerinə yetirsəydim, daha çox qol vurardım”. Həmin şəxs qismən də haqlı olacaq. Ancaq kim nə deyirsə desin, əfsanəvi forvardın bu prinsipinə hörmət etməmək mümkün deyil.

Heybət