Rusiyanın üçüncü böyük şəhəri olan Novosibirskdə istilik sistemindəki nasazlıq səbəbindən küçələri qaynar su basıb.

Publika.az xəbər verir ki, ötən gün Sibir Federal Dairəsinin paytaxtı Novosibirskin Leninski rayonunda mərkəzi istilik sistemindəki texniki nasazlıq yüzlərlə çoxmənzilli binaya ziyan vurub.

Novosibirsk meri Oleq Klemeşov bildirib ki, nasazlıq səbəbindən ümumilikdə 237 binada istilik təmin oluna bilməyib. Həmçinin bildirilib ki, 20 məktəb istiliklə bağlı nasazlıq səbəbindən distant təhsilə keçib. Bundan əlavə, bəzi xəstəxanalarda əvvəlcədən planlaşdırılmış əməliyyatların aparıla bilmədiyi və Kirovski rayonunda tramvayların hərəkətinin dayandırıldığı bildirilib.

Hadisə baş verən zaman şəhərdə havanın temperaturu -15 dərəcə olub. Regionda fəaliyyət göstərən enerji şirkəti “Siberian Generating Company” problemin sovet dövründən qalma boru kəmərlərindən qaynaqlandığını və texniki qrupların nasazlığı ən qısa zamanda aradan qaldıracağını bildirib.

Şirkətin paylaşdığı məlumata görə, istilik infrastrukturu 1974-cü ildə qurulub. Digər tərəfdən, Rusiya İstintaq Komitəsi hadisə ilə bağlı təhlükəsizlik qaydalarının pozulmadığını müəyyən etmək üçün araşdırmaya başlanıldığını açıqlayıb.

Aysel