Azərbaycan Respublikasının Dövlət Turizm Agentliyi tərəfindən həyata keçirilən “Turizm sahəsində layihələrin maliyyələşdirilməsi üzrə 2-ci qrant müsabiqəsi”nin qalibi Ramiz Kəlbi oğlu Kəlbiyevin “Astara rayonunun Sım kəndində aqroturizmin inkişaf etdirilməsi və təşviqi” layihəsi uğurla icra olunmaqdadır.

Layihənin icrasına başlanması məqsədilə ilkin mərhələdə Sım kəndinə səfər təşkil edilmişdir. Ərazi ilə tanışlıq zamanı kəndin aqroturizm potensialı və kəndin layihə məkanı kimi seçilməsinin məqsədəuyğunluğu təsdiqini tapmışdır. Layihənin icrasında Dövlət Turizm Agentliyinin Lənkəran Regional Turizm İdarəsi də təşkilati dəstək göstərməkdədir. Səfər çərçivəsində layihənin icrasına rəsmi şəkildə start verilmiş, görüləcək işlər müzakirə olunaraq iştirakçılar arasında vəzifə bölgüsü aparılmışdır.

Səfərin məqsədi arıçılıq üzrə işlərin təşkili məqsədilə avadanlıqların quraşdırılacağı yerlərin müəyyənləşdirilməsidir. Müqayisəli baxış nəticəsində üç potensial sahə qiymətləndirilmiş və aqroturizmin inkişafı, avadanlıqlardan səmərəli istifadə imkanları, həmçinin onların mühafizəsi nəzərə alınaraq optimal yer seçilmişdir.

Səfər zamanı kənddə mövcud arıçılıq təsərrüfatlarına baxış keçirilmiş, arıçılığın spesifik xüsusiyyətləri, təsərrüfatlarda profilaktik tədbirlərin aparılması, qış mövsümünə hazırlıq, arıçılıq məhsullarının istehsalı və digər məsələlər ətrafında müzakirələr aparılmışdır. Eyni zamanda, konstruktiv baxımdan diqqətçəkici arı yeşikləri də nəzərdən keçirilmişdir.

Layihə çərçivəsində istifadə olunacaq avadanlıqların xüsusiyyətləri, miqdarı və keyfiyyəti barədə fikir mübadiləsi aparılmış, layihənin uğurla başa çatdırılması üçün rəy və təkliflər qeydə alınmışdır.

Kəlbiyeva Ülviyyə.