Türkiyədə qaz qovşağı layihəsinin həyata keçirilməsi planlarında heç bir dəyişiklik yoxdur.

Publika.az xəbər verir ki, bu barədə Ankaradakı məlumatlı mənbə “RİA Novosti”yə bildirib.

Rusiya baş nazirinin müavini Aleksandr Novak daha əvvəl ümid etdiyini bildirib ki, 2024-cü ildə bu layihənin icrasına başlanılacaq.

"2024-cü il üçün planlarda heç bir dəyişiklik yoxdur. Layihənin həyata keçirilməsi üçün bütün detallar diqqətlə işlənməlidir. Ona görə də yol xəritəsi ilə bağlı Rusiya tərəfi ilə müzakirələrimiz vacib olacaq, burada hər şeyi diqqətlə nəzərdən keçirəcəyik", - agentliyin məlumatında deyilir.

Mətbuatda ilk dəfə 2022-ci ilin oktyabrında Türkiyənin qaz qovşağından yazmağa başlayıblar. Daha sonra, “Şimal axını”nda terror aktından iki həftə sonra Rusiya prezidenti Vladimir Putin itirilmiş Rusiya qazının tranzit həcminin Qara dəniz regionuna köçürülməsi ideyasını irəli sürüb. Onun sözlərinə görə, Türkiyədə qaz qovşağı yaratmaq olar ki, bu da digər ölkələrə, ilk növbədə Avropaya tədarük üçün platformaya çevriləcək, həm də qazın qiymətinin müəyyənləşdirilməsinə xidmət edəcək.

Bu ilin noyabrında Türkiyənin enerji və təbii sərvətlər naziri Alparslan Bayraktar bildirmişdi ki, Ankara Türkiyənin qaz ticarət platformasını beynəlxalq səviyyəyə çatdırmaq üçün “Qazprom”la danışıqlar aparır. Onun sözlərinə görə, respublika qaz ticarəti üçün elektron platformanın yaradılması üzrə işləri 2024-cü ildə başa çatdıra biləcəyini gözləyir.

Tural