Sabah Rusiyada ümumi seçki marafonu başlayır. Ukraynanın Donbas bölgəsində səsvermənin olacağını vurğulayan Rusiya prezidenti Vladimir Putin hər kəsi səsverməyə çağırıb.

Publika.az xəbər verir ki, Putin seçkilərdən əvvəl ictimaiyyətə müraciət edərək hər kəsi səsverməyə dəvət edib.

Putin çıxışında bu ifadələrə yer verib: “Vurğulamaq istərdim ki, ölkəmizdə hakimiyyətin yeganə mənbəyi xalqdır. Bu mühüm hüquqi müddəa Konstitusiyaya daxil edilib. Bu o deməkdir ki, yalnız siz, Rusiya vətəndaşları, vətənin gələcəyini təyin edəcəksiniz. Siz nəinki səs verəcəksiniz, həm də birmənalı olaraq öz iradənizi, arzularınızı və Rusiyanın gələcəyində şəxsi iştirakınızı bəyan edəcəksiniz, çünki seçki gələcəyə doğru bir addımdır. Bunu ən çətin şərtlər altında Rusiyaya birləşmək üçün referendumda səs verən və indi seçkilərini keçirəcək Donbas və Novorossiya (Rusiyanın yeni layihəsi - Azov və Qara dənizlərə bitişik ərazi) sakinləri yaxşı başa düşürlər”.

Putin qeyd edib ki, cəbhədəki əsgərlər də səs verəcək: “Onlar şücaət və qəhrəmanlıq göstərərək vətənimizi müdafiə edir, hamımıza nümunə olmaq üçün seçkilərdə iştirak edirlər. Rusiya çoxmillətli xalqdır, hamımız bir ailəyik. Ona görə də xahiş edirəm, seçki məntəqələrinə gəlin və vətəndaşlıq mövqeyinizi göstərin, seçdiyiniz namizədə və sevimli Rusiyanın firavan gələcəyinə səs verin”.

Aysel Şahmar