“Karnegi” Fondunun saytında analitik Tomas de Vaalın məqaləsi dərc olunub. Məqalədə o, 2024-cü ilin həm Ukrayna, həm də Cənubi Qafqaz üçün həlledici olacağını bildirib. Onun sözlərinə görə, eyni zamanda, bu, Avropa siyasətçiləri üçün ciddi sınaq olacaq.

Publika.az xəbər verir ki, De Vaal Ermənistan-Azərbaycan münasibətlərinin nizamlanması üzrə danışıqların davam edəcəyini vurğulayıb.

O bildirib ki, bütün uduş kartlarının çoxu Azərbaycanın əlindədir: “Yenidən prezident seçilən Azərbaycanın dövlət başçısı İlham Əliyev heç vaxt özünə bu qədər arxayın olmayıb. Əliyevin özünə inamı həm də iki güclü qonşusu - Rusiya və Türkiyə ilə yaxşı münasibətlər saxlaya bilməsidir. Üstəlik, bu zaman həmin ölkələrin rəhbərləri ilə şəxsi münasibətlərə önəm verilir ki, bu da son dərəcə vacibdir”.

De Vaalın sözlərinə görə, Azərbaycanla Ermənistan arasında sülh müqaviləsi ilə bağlı yekun razılığa gəlmək üçün üç əsas məsələ var:

“Birincisi, Ermənistanla Azərbaycan arasında sərhədin demarkasiyası və delimitasiyası ilə bağlıdır. Məsələ burasındadır ki, bu məsələdə sovet bölgəsinin çoxlu xəritələri var ki, onlar sonda sərhəd xəttinin haradan çəkilməli olması ilə bağlı müxtəlif fikir və şərhlərə əsas verir.

İkinci məsələ beynəlxalq təminatlar və mümkün mübahisələrin həlli mexanizmləri ilə bağlıdır. Onlar müqavilənin sabitliyini qorumaq üçün lazımdır. Bu baxımdan Ermənistan tərəfi mümkün qədər çox beynəlxalq dəstək, Azərbaycan tərəfi isə mümkün qədər az beynəlxalq dəstək istəyir.

Son dərəcə mübahisəli olan üçüncü məsələ isə Azərbaycanın əsas ərazisini Ermənistan vasitəsilə Naxçıvan MR ilə birləşdirən 43 km-lik yolun açılması ilə bağlıdır. Bakı dəhlizin tezliklə açılmasını istəyir, İrəvan isə razılaşmır”.

Analitik qeyd edib ki, bu vəziyyətdə Qərb ikinci və üçüncü məqamlarda son dərəcə maraqlıdır. Onun sözlərinə görə, İrəvan nəyin bahasına olursa-olsun Rusiyanın təsirindən qurtulmağa çalışır, düşünür ki, Rusiya hərbi mövcudluğu onların maraqlarına strateji zərbə olacaq:

“Ermənistanda müəyyən fikirlər var ki, Moskva ilə Bakı arasında müəyyən razılaşma var ki, bunu Ankara da təsdiqləyib. Ruslar üçün dəhlizin açılması uğur olar. Dəhliz Rusiyanın Yaxın Şərqlə əlaqələrini bərpa edə biləcəyi əsas dəmir yolu ola bilər, çünki Rusiya-Ukrayna müharibəsi səbəbindən Qərblə qarşıdurma hələ uzun müddət davam edəcək”.

Tomas De Vaal diqqətə çatdırıb ki, Bakı istədiyini əldə etməyənə qədər sülh sazişi imzalanmayacaq.

Murad