İsrail Xarici İşlər Nazirliyinin (XİN) yeni rəhbəri İsrael Katz Ukrayna ilə münasibətləri gücləndirməyə ümid etdiyini bildirib.

Publika.az xəbər verir ki, bu barədə o, "X" sosial şəbəkəsindəki səhifəsində məlumat verib.

Diplomat nazir vəzifəsinə təyin olunması münasibətilə ukraynalı həmkarı Dmitri Kulebanın ona ünvanladığı təbrikdən sitat gətirib: "Mən sizinlə işləməyi və ölkələrimiz və xalqlarımız arasında əlaqələri gücləndirməyi səbirsizliklə gözləyirəm".

İsrail Katz 2023-cü ilin sonuna qədər İsrailin energetika naziri vəzifəsində çalışıb. 2024-cü ilin yanvarında əsas siyasi partiyalar arasında koalisiya razılaşmasına görə o, xarici işlər naziri vəzifəsində sələfi Eli Koeni əvəz edib.

Bundan əvvəl İsrailə məxsus pilotsuz təyyarənin Beyrutun cənubunda Fələstinin Həmas qruplaşmasının ofisinə zərbə endirdiyi məlum olub. Yaxınlıqda Livanın Hizbullah qruplaşmasının ofisləri də var idi. Bir neçə nəfər yaralanıb, dörd nəfəri xilas etmək mümkün olmayıb.