"Elm və Təfəkkür Universiteti”nin prorektoru Tariyel Əhmədovun öldürülməsində təqsirləndirilən həmin universitetin rektoru Müşfiq Atakişiyev, Dəyanət Quliyev və Samir Quliyevin cinayət işi üzrə məhkəmə prosesi keçirilib.
Publika.az xəbər verir ki, Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən iclasda cinayət işi üzrə sənədlər elan edilib.
İlk olaraq Samir Quliyev və Dəyanət Quliyevin ibtidai istintaq zamanı verdiyi ifadəsi elan edilib.
Dəyanət Quliyev ifadəsində Tariyel Əhmədova xəsarət yetirməsi barədə dayısı Müşfiq Atakişiyevdən sifariş aldığını, amma bu hadisəni özünün yox, tanışı Samir Quliyevə sifariş verdiyini deyib.
O, həmçinin ifadəsində Samir Quliyevin iki dəfə narkotik vasitə ilə həbs edildiyini, sonradan dayısından 3 min manat alaraq onu həbsdən azad etdirdiyini deyib.
Həmçini Müşfiq Atakişiyevin ibtidai istintaq zamanı verdiyi ifadəsi açıqlanıb. O ifadəsində göstərib ki, Tariyel Əhmədovu 1995-ci ildən tanıyıb. O bildirib ki, sonradan rektor vəzifəsinə Tariyel Əhmədovun iddialı olması ilə bağlı məlumat əldə edib. Buna görə də Tariyel Əhmədova xəsarət yetirməklə bağlı bacısı oğlu Dəyanət Quliyevə sifariş verib. O, Tariyel Əhmədovu öldürmək yox, xəsarət yetirmək istəyib: "Bu işi görmək üçün bacım oğlu Dəyanətə sifariş verdim. Tapşırdım ki, Tariyelə xəsarət yetirib, xəstəxanalıq etsin. Onun ölməyini istəmirdim. Çünki onunla aramızda konflikt olub, hamı məndən şübhələnəcəkdi".
Daha sonra Dəyanət Quliyevin Daxili İşlər Nazirliyinin 102 xidmətinə zəng edib, hadisəni etiraf etməsi barədə səs yazısı elan edilib. Həmin səs yazısında Dəyanət Quliyev Tariyel Əhmədovu təkbaşına öldürdüyünü deyib.
Bundan başqa istintaq sənədlərində Dəyanət Quliyev 102-yə zəng etməmişdən əvvəl Müşfiq Atakişiyevə 21 dəfə zəng edib.
Daha sonra hakim məhkəmə istintaqının tamamlanması barədə tərəflərin fikirini soruşub. Tərəflər məhkəmə istintaqının tamamlanmasına etiraz etməyib.
Hakimlər məhkəmə istintaqının tamamlanması barədə qərar qəbul edilib. Prokurora çıxış etmək üçün söz verilib. Prokuror çıxışa hazırlaşmaq üçün vaxt istəyib.
Bu səbəbdən növbəti iclas martın 27-ə təyin edilib.
İttihama görə, “Elm və Təhsil Mərkəzi Təfəkkür Universiteti”nin prorektoru Tariyel Əhmədovun 16 sentyabr 2011-ci il tarixdə qəsdən öldürülməsi faktı ilə bağlı başlanmış cinayət işi üzrə həyata keçirilən istintaq-əməliyyat tədbirləri nəticəsində cinayəti törətməkdə təqsirləndirilən şəxslər ifşa edilib.
İbtidai istintaq zamanı həmin universitetin rektoru vəzifəsində işləmiş Müşviq Atakişiyevin Tariyel Əhmədovu öldürməyi qohumu Dəyanət Quliyevə sifariş verməsi, sifariş əsasında isə Samir Quliyevin cinayəti törətməsinə əsaslı şübhələr müəyyən edilib.
Toplanmış sübutlara əsasən rektor vəzifəsində qalmasına və işgüzar nüfuzuna maneə kimi qəbul etdiyi üçün Müşfiq Atakişiyevin qisas məqsədilə pul müqabilində zərərçəkmiş şəxs Tariyel Əhmədovun öldürülməsini öz qohumu Dəyanət Quliyevə sifariş verməsi, onun isə 40 min ABŞ dolları müqabilində, habelə gələcəkdə maddi və mənəvi dəstək olmaq şərtilə bu cinayəti sifariş verdiyi həmkəndlisi Samir Quliyevin bir neçə gün zərərçəkmişi izlədikdən sonra Bakı şəhəri, Yasamal rayonunun Şərifzadə küçəsində yerləşən idman meydançalarından birində küt əşya ilə bir neçə dəfə onun baş və bədəninin müxtəlif nahiyələrinə zərbələr endirərək ölümünə səbəb olan xəsarətlər yetirməsi müəyyən olunub.
İttihamda qeyd edilib ki, təqsirləndirilən Müşfiq Atakişiyev “Təfəkkür Universiteti”nin rektoru işləyərkən universitetin prorektoru Tariyel Əhmədovu özünə rəqib hesab edib, gələcəkdə onun rektor ola biləcəyini düşünüb.
Atakişiyev belə qənaətə gəlib ki, Əhmədovu aradan götürməklə işləri həll edə bilər. O, bu haqda bacısı oğlu, polis əməkdaşı Dəyanət Quliyevlə danışıb. O, Dəyananətə T.Əhmədovu maşınla və ya küt alətlə vurmağı tapşırıb.
Dəyanət Quliyev bundan sonra uşaqlıq dostu Samir Quliyevlə görüşüb, prorektoru öldürmək üçün ona 40 min dollar pul verib. Plana görə, prorektor səhər gəzintisinə çıxan vaxt Samir onu vurmalı idi.Samir Quliyev bir neçə gün izləmədən sonra səhər saat 4-5 radələrində gəzintiyə çıxan T.Əhmədovu tək yaxalayıb. O, əlindəki dəmir boru ilə bir neçə dəfə Əhmədovun baş nahiyəsindən güclü zərbə endirib, daha sonra cinayət alətini kimsəsiz əraziyə ataraq hadisə yerindən qaçıb.
Müşviq Atakişiyev və Dəyanət Quliyev Cinayət Məcəlləsinin 32.3, 120.2.5-ci (sifarişlə adam öldürmədə təşkilatçı), Samir Quliyev isə həmin Məcəllənin 120.2.5-ci (sifarişlə adam öldürmədə) maddəsilə təqsirləndirilən şəxs qismində cəlb ediliblər.
Məlum olub ki, təqsirləndirilən Dəyanət Quliyev hadisə vaxtı daxili işlər orqanlarında işləyib. O, 2000-ci ildən 2020-ci ilə kimi Binəqədi Rayon Polis İdarəsinin 7-ci Polis Şöbəsində əməliyyat müvəkkili işləyib. Samir Quliyev isə taksi fəaliyyəti ilə məşğul olub.
Həmçinin Müşfiq Atakişiyev Elm və Təhsil Nazirliyinin İqtisadiyyat İnstitutunun icraçı direktoru və həmin İqtisadiyyat İnstitutu nəzdində iqtisad elmləri sahəsində doktorluq dissertasiya şurasının sədri vəzifəsində çalışıb.
Qeyd edək ki, iqtisad elmləri doktoru, professor Müşviq Atakişiyev Təfəkkür Universitetinin rektoru olub. Təfəkkür Universiteti 2017-ci ildə ləğv edilib. (Teleqraf.com)
