Cənubi Koreya prezidenti Yoon Suk Yeol ölkəsinin aşağı doğum səviyyəsinin qarşısını almaq üçün "demoqrafik milli fövqəladə vəziyyət" elan etdiyini açıqlayıb.

Publika.az xəbər verir ki, prezident hökumətin aşağı doğum nisbəti ilə əlaqədar hər cür səy göstərəcəyini diqqətə çatdırıb.

O rəsmi olaraq demoqrafik milli fövqəladə vəziyyət elan etdiyini bildirib:

“Aşağı doğum nisbəti problemi aradan qaldırılana qədər hərtərəfli müdaxilə sistemini işə salacağıq. Bu kontekstdə üç əsas sahəyə diqqət yetiriləcək: İş, uşaqlara qayğının yaxşılaşdırılması və daha yaxşı mənzil təminatı. Valideynlərin yükünü yüngülləşdirmək üçün ibtidai məktəblərdə uşaq baxımına dəstəyin artırılması və məktəbdənkənar proqramlar genişləndiriləcək. Tədbirlərin həyata keçirilməsini təmin etmək üçün müvəqqəti olaraq Əhali Strategiyasının Planlaşdırılması Nazirliyi yaradılacaq”, - Prezident bildirib.

Qeyd edək ki, Cənubi Koreya 0,72 ilə 2023-cü ildə ən aşağı doğum səviyyəsi olan ölkələr arasında birinci yerdədir.

Aysel Şahmar