Azərbaycanda yetkinlik yaşına çatmayan qızı evlənmək məqsədilə qaçıran və hamilə qalmasına səbəb olan şəxs cinayət məsuliyyətinə cəlb edilib.

Publika.az-ın əldə etdiyi məlumata görə, Ağdaş rayon Məhkəməsində rayonun Aşağı Ağcayazı kənd sakini, 2000-ci il təvəllüdlü Nurlan Bəşirova hökm oxunub.

Müəyyən edilib ki, Nurlan Qəbələ rayon sakini olan 14 yaşlı qızla tanış olduqdan sonra onu evlənmək məqsədilə qaçırıb. Onlar birgə Nurlanın Bakı şəhər Yasamal rayonunda kirayə qaldığı evə gələrək gizləniblər və 4 gün paytaxtda qaldıqdan sonra birgə Ağdaşa qayıdaraq ər-arvad kimi yaşayıblar. Bir müddət əvvəl isə yeniyetmə qız Qəbələ rayon Mərkəzi xəstəxanasında uşaq dünyaya gətirib.

Bundan sonra Nurlan barəsində Cinayət Məcəlləsinin 152.1-ci (16 yaşına çatmayan şəxslə cinsi əlaqədə olma) maddəsi ilə cinayət işi açılıb.

Ağdaş rayon Məhkəməsinin 17 yanvar 2024-cü il tarixli hökmü ilə Nurlan Bəşirov 1 il 6 ay müddətinə azadlıqdan məhrumetmə cəzasına məhkum edilib. Onun cəzası sınaq müddəti təyin edilməklə şərti hesab edilib.

Turqut Seyidov