Tələbələrin bir qismi bəzən oxuduqları ixtisası seçdiklərinə görə peşman olurlar. Bu barədə tələbələrlə sorğu keçirdik. Öz fikirlərini açıqladılar.

Mingəçevir Dövlət Universitetinin tələbəsi Şəhla Feyzullayeva qeyd edir: "Mənim ixtisasım Məktəbəqədər təhsildir. Universitetə qəbul olanda bu ixtisası istəmirdim. Həvəslə dərslərə getmirdim. Vaxt keçdikcə, bağça ilə bağlı mövzuları öyrəndikcə həvəsim artmağa başladı. Fikirləşdim ki, istədiyim ixtisas uşaqlarla işləməkdir.  Məktəbəqədər təhsil də uşaqlarla işləməkdir, onlarla ünsiyyətdə olmaqdır. Zamanla qəbul olduğum ixtisası sevməyə başladım. Fikrimi dəqiqləşdirdiyim yer isə müəlliməm bizi bağçaya aparıb gətirdikdən sonra oldu. O ortam, o məsumluq məni o qədər xoşbəxt etdi ki, dedim "budur mən əsl bağça müəllimi olmalı imişəm" Bəzilərinə çətin gələ bilər, hətta ətrafımda "bağça nədir?" "Balaca uşaqların kaprizini çəkə biləcəksən?" "Heyf deyil başqa ixtisas?" kimi suallar iradlar və s. eşidirəm. Bugün şükür edirəm ki, yaxşiki bu ixtisasa qəbul olmuşam. Onlarla ünsiyyətdə olduqca əsəblərim sakitləşir , özümü o qədər rahat və xoşbəxt hiss edirəm ki.. Peşəmə olan sevgimi ifadə etməyə sözlər belə kifayətsizdir. Məncə, hər insan istəmədiyi bir ixtisasa qəbul olubsa belə o ixtisası özünə sevdirib yoluna baxmalıdır". 

Bakı Dövlət Universiteti Jurnalistika fakültəsinin tələbəsi Çingiz Əmrahov qeyd edir: "Hazırda bizə nəzəri biliklərlə yanaşı, praktik tapşırıqlar da verilir. Bu da həmin fənnin mahiyyətini dərk etməkdə bizə kömək edir. Hərdən dərslərimizə nüfuzlu şəxsləri də dəvət edirlər. Fakültəmizdə təlim-tədris studiyasının fəaliyyətdə olması da ayrıca üstünlükdür ki, tələbələr bura daxil olub özlərini bir növ teleradio sahəsində hiss edirlər. Məzun tələbələr bir sıra qabiliyyətlərə yiyələnərək müxtəlif media subyektində işləmək imkanına malik ola bilirlər. Bununla da deyə bilərəm ki, oxuduğum ixtisasdan razıyam". 

Azərbaycan Dövlət İqtisad Universitetinin İqtisadiyyat ixtisası üzrə təhsil alan Almaz Məhərrəmli bildirir: "Bu ixtisası sırf öz istəyim ilə seçmişəm və heç peşman deyiləm. Hal-hazırda ölkənin iqtisadiyyatı, maliyyə-mühasibat durumu çox gündəmdə olduğu və olacağı üçün bu ixtisasa yüksək dərəcədə tələb var. Şirkət və idarələrin əksəriyyəti  iqtisadiyyat, maliyyə, mühasibat kimi vakansiya elan edirlər. Düşünürəm ki, gələcəkdə daha çox tələbat yaranacaq. Hətta qeydə alınıb ki, iş elanlarının 17%-i iqtisadiyyat və idarəetmə üzrədir. Bu ixtisası bitirən məzunlar üçün iş imkanları çox yerdə ola bilər. Məsələn, banklarda, kredit təşkilatlarında, vergilər nazirliyində, iqtisadiyyat nazirliyində çalışa bilərlər". 

Bakı Dövlət Universiteti Jurnalistika fakültəsinin tələbəsi Niyaz Hacıyev: "Təhsil aldığım ixtisasdan çox razıyam.Düşünürəm ki, Bakı Dövlət Universiteti ixtisasım üzrə kadr hazırlığında liderdir, çünki jurnalistika incəliyinə qədər öyrədilir. Nəzəriyyə və praktika vəhdət təşkil edir. Nəzəri biliklərlə yanaşı praktiki tapşırıqların verilməsi peşəni daha dərindən mənimsəməkdə kömək olur. Fikrimcə, jurnalistika qədər yaxşı peşə yoxdur, çünki jurnalistlər ictimaiyyətə təsir edir. İctimai şüurun formalaşmasında yaxından iştirak edirlər. Jurnalistika 4-cü hakimiyyətdir. Bu ixtisasda olduğum üçün özümü xoşbəxt hiss edirəm". 

Prezident yanında Dövlət İdarəçilik Akademiyasının Siyasi idarəetmə fakültəsi Dövlət və ictimai münasibətləri ixtisasında təhsil alan İlqar Abasov qeyd edir: "İxtisasımı sevirəm. 

Bu ixtisas Azərbaycanda yenidir, hərtərəflidir və gələcək üçün də önəmlidir. Hüquqşünaslıq ixtisasına düşə biləcəyim halda bu ixtisası seçdim və yaxşıki seçmişəm, peşman deyiləm. Həmçinin, bu ixtisas üzrə fənləri bizə tədris edən müəllimlər də kifayət qədər savadlı olaraq bu ixtisasa olan sevgimin  daha artmasına və biliklərimin çoxalmasına səbəb olublar". 

Bakı Dövlət Universiteti Kompüter Elmləri ixtisasında təhsil Elnur Musayev isə deyir: "Oxuduğum ixtisasdan razıyam. Dərslər əla davam edir. Hər şey möhtəşəmdir. Heç bir narahatçılıq yoxdur. Müəllimlərimiz dərsləri çox gözəl tədris edirlər".