ABŞ Prezidenti Donald Tramp 2 aprel tarixini ölkənin iqtisadi müstəqilliyi günü elan edib və genişmiqyaslı gömrük tarifləri tətbiq etdiyini açıqlayıb.

Qutb.az xəbər verir ki, Ağ Evin Rəngli Bağında təşkil olunan tədbirdə Tramp ABŞ-ın son 50 ildə iqtisadi istismara məruz qaldığını iddia edib və bu vəziyyətin dəyişəcəyini bildirib.

Yeni tariflər Çin üçün 34%, Avropa İttifaqı üçün 20%, Yaponiya üçün 24%, Hindistan üçün 26% təşkil edəcək. Ən yoxsul ölkələrdən biri olan Vyetnam və Myanma üçün isə bu tariflər 50%-ə qədər artırılacaq.

Bundan əlavə, bütün ölkələrdən minimum 10%-lik gömrük rüsumu alınacaq. Bu addımın əsas məqsədi ABŞ iqtisadiyyatını qorumaq və ticarət balansını bərabərləşdirməkdir.

Siyahıda Azərbaycanda da var. ABŞ ölkəmizə 10% gömrük rüsumu tətbiq edib.

Tramp Konqresin təsdiqini gözləmədən tarifləri tətbiq etmək üçün ABŞ-ın xarici ticarət kəsirini fövqəladə hal elan edib. Bu addım Trampa qanunvericilikdən yan keçərək birbaşa qərarlar verməyə imkan yaradır.

"İllər boyu zəhmətkeş amerikalılar kənarda oturmaq məcburiyyətində qalıblar, digər ölkələr isə əsasən bizim hesabına zənginləşib və güclü olublar. Amma indi çiçəklənmə növbəsi bizimdir", - Tramp deyib.

Ticarət tərəfdaşları – Çin, Avropa İttifaqı və Kanada bu tariflərə qarşı çıxıb, sərt cavab tədbirləri görəcəklərini açıqlayıblar. Ekspertlər hesab edirlər ki, Trampın proteksionist siyasəti qlobal ticarətə mənfi təsir göstərəcək və dünya iqtisadiyyatında böhrana səbəb ola bilər. ABŞ vətəndaşları isə bu tariflərin təsirindən dolayı qiymət artımları ilə təsirlənəcək.

Tramp tariflərin iqtisadi ədaləti bərpa edəcəyini iddia etsə də, mütəxəssislər bunun əsasən daxili siyasətdə və beynəlxalq danışıqlarda ona əlavə təzyiq rıçaqları qazandırmaq məqsədi daşıdığını bildirirlər. ABŞ prezidenti bu tariflərdən istifadə edərək, Avropanı daha çox müdafiə xərcləri çəkməyə məcbur etmək, Kanada və hətta Qrenlandiyanı öz nəzarətinə keçirmək istədiyini açıq şəkildə ifadə edib.

Beynəlxalq iqtisadi ekspertlər Trampın ikinci prezidentlik dönəmində bu tariflərin davamlı olub-olmayacağını və ya gələcək razılaşmalarla yumşaldılıb-yumşaldılmayacağını proqnozlaşdırmağın çətin olduğunu bildirirlər. Lakin aydındır ki, 2 aprel 2025-ci il qlobal ticarət tarixində dönüş nöqtəsi kimi qalacaq.