Keçən ilin dekabrında bu vəzifəyə təyin edilmiş Çinin müdafiə naziri Donq Jun Çin Xalq Azadlıq Ordusunda (PLA) korrupsiya ilə bağlı genişmiqyaslı təhqiqatın bir hissəsi kimi araşdırılır.
QÜTB.AZ xəbər verir ki, bu barədə "Financial Times" (FT) öz mənbələrinə istinadən yazıb.
Nəşr qeyd edir ki, Çin prezidenti Si Cinpin PLA rəhbərliyinə qarşı bir sıra araşdırmalar aparılması haqda göstəriş verib. Eyni zamanda, agentliyin həmsöhbətləri Donq Juna qarşı hansı növ korrupsiya ittihamlarının irəli sürüldüyünü dəqiqləşdirməyiblər.
FT yazır ki, Donq Jun artıq Çin Müdafiə Nazirliyinin korrupsiya şübhəsi ilə araşdırılan üçüncü rəhbəridir. O, bu vəzifəsinin icrasına başladıqdan 7 ay sonra istefaya göndərilən general Li Şanfunu əvəz edib. Nəşr Li Şanfunun rüşvətxorluğa görə istintaqa cəlb edildiyini də yazmışdı.
Adəm Abbaslı
