İtaliya məhkəməsi Almaniyanın İkinci Dünya Müharibəsi zamanı nasist qırğınında həlak olanların yaxınlarına əlavə 4 milyon avro təzminat ödəməsi barədə qərar çıxarıb.

QÜTB.AZ xəbər verir ki, bu barədə İtaliya mətbuatı yazıb.

L'Akuiladakı apellyasiya məhkəməsi Almaniyanın qətliamda yaxınlarını itirən daha 30 nəfərə 4 milyon avro təzminat ödəməsinə qərar verib. Əvvəlki qərarda açıqlanan təzminatla ödəniləcək ümumi məbləğ 15 milyon avro olacaq.

Mətbuatda Avropa İttifaqının (Aİ) verdiyi COVID-19-dan sonrakı bərpa fondunda “nasist cinayətləri” üçün ayrılan hissədən İtaliyaya təzminatın yaxın aylarda Almaniya tərəfindən ödəniləcəyi bildirilib.

Qeyd edək ki, 1943-cü il noyabrın 21-də faşistlər L'Akuila şəhəri yaxınlığındakı Pietransieridəki Limmari meşəsində yerli əhalinin İtaliya müqavimətini dəstəklədiyi şübhəsi ilə qətliam törədib. Qətliamda 128 silahsız mülki vətəndaş həyatını itirib. Ölənlərdən 60-nın qadın, 34-nün 10 yaşa qədər uşaq və çoxlu sayda qoca olduğu bildirilib.

Roza