Türkiyənin hakim Ədalət və İnkişaf Partiyasının (AKP) ortağı Milliyyətçi Hərəkat Partiyasının (MHP) sədri Dövlət Bağçalı növbəti tarixi təkliflə çıxış edib.

Bir müddət əvvəl PKK terror təşkilatının həbsdəki rəhbəri Abdullaha Öcalana müraciəti ilə diqqət mərkəzinə düşən Bağçalı bu dəfə Türkiyə konstitusiyası ilə bağlı təklif səsləndirib.

Qeyd edək ki, Bağçalının Öcalana müraciəti ilə başlayan proses PKK terror təşkilatının ləğv edilməsi ilə bağlı çağırışla yekunlaşıb.

Bağçalı milli birliyin gücləndirilməsi və demokratik prinsiplərin daha da möhkəmləndirilməsi üçün yeni bir konstitusiyanın qəbul edilməsinin vacibliyini vurğulayıb.

Onun sözlərinə görə, mövcud konstitusiya hələ də keçmiş hərbi müdaxilələrin izlərini daşıyır və bu miras tamamilə aradan qaldırılmalıdır.

Yeni konstitusiya islahatlarının məqsədi Türkiyənin demokratik standartlarını yüksəltmək, insan haqlarını və qanunun aliliyini daha güclü şəkildə təmin etməkdir. O qeyd edib ki, bu prosesdə siyasi partiyalar və ictimai təşkilatlar da fəal iştirak etməli, milli birlik və bərabərlik prinsipləri əsas götürülməlidir.

Qutb.az-a açıqlamasında Cümhuriyyət Xalq Partiyasının(CHP) sədr müavini İlhan Üzgel bildirib ki, CHP Türkiyənin prioritet probleminin konstitusiya olmadığını düşünür:

"Son dönəmdə kürd məsələsi ilə bağlı olaraq, Bağçalının mövqeyi həll prosesinin konstitusiyon dəyişikliklə birlikdə aparılmasıdır. Cənab Bağçalı yeni bir  konstitusiyanın zəruriliyindən söz açarkən, hansı maddələri nəzərdə tutduğunu və necə bir konstitusiya hədəfləyir bu, yetərincə açıq deyil".

Qeyd edək ki, Türkiyə Prezident Rəcəb Tayyib Ərdoğan da konstitusiyanın dəyişməsinin zəruri olduğunu bildirib.