Moskva ilə Tehran arasında hərtərəfli əməkdaşlıq sazişi üzərində iş prosesi dayandırılıb.

Publika.az xəbər verir ki, bunu Rusiya Xarici İşlər Nazirliyinin ikinci Asiya departamentinin direktoru Zamir Kabulov deyib.

"İranlı tərəfdaşların indi həll olunacaq problemləri var" deyən diplomat hansı çətinliklərdən söhbət getdiyini açıqlamayıb.

Eyni zamanda, o, bu müqavilənin bağlanmasının hər iki ölkə üçün heç vaxt qüvvəsini itirməyən strateji qərar olduğunu diqqətə çatdırıb.

Mayın 19-da İran prezidenti İbrahim Rəisini daşıyan helikopter ölkənin şimal-qərbində sərt eniş edib. Helikopterdə prezidentlə birlikdə İran Xarici İşlər Nazirliyinin rəhbəri Hüseyn Əmir Abdullahyan, Şərqi Azərbaycan vilayətinin başçısı Mələk Rəhməti və Təbriz şəhərinin cümə imamı Məhəmməd Əli Haşim də olub.

Sərnişinlərdən heç biri qəzadan sağ çıxa bilməyib. Rəisi ilə yaşanan faciəyə baxmayaraq, Rusiya İranla sıx əməkdaşlığa sadiqliyini təsdiqləyir və razılaşmaların tam şəkildə həyata keçirilməsini gözləyir.

Bu barədə Rusiya xarici işlər nazirinin müavini Sergey Ryabkov məlumat verib. O, həmçinin qeyd edib ki, İran tərəfi Rusiyanın maraqlarını tam şəkildə anlayır və qarşılıq verir.

Xatırladaq ki, yanvar ayında Rusiya və İranın böyük dövlətlərarası saziş imzalamağa hazırlaşdığı xəbəri yayılmışdı. Moskva və Tehran, qeyd edildiyi kimi, bərabər çoxqütblü dünya yaratmaq üçün birgə səyləri davam etdirmək üçün bu addımı atır. Eyni zamanda, telefon danışıqları zamanı iki ölkənin müdafiə nazirləri hərbi və hərbi-texniki təminat məsələlərini müzakirə etmişdilər.

Həmçinin yanvar ayında Rusiya və İranın xarici işlər nazirləri Sergey Lavrov və Hüseyn Əmir Abdullahyan da yeni sazişin hazırlanmasının gedişatı barədə danışmışdılar. Danışıqlar fonunda xarici işlər nazirləri Rusiya və İran arasında əməkdaşlığa dair bir sıra məsələlər qaldırmışdılar.

Adəm