Dünyanın ən böyük kənd təsərrüfatı ixracatçılarından biri olan Hindistan buğda ixracını qadağan etdikdən sonra beynəlxalq bazarlarda şəkərin satışını məhdudlaşdırmaq qərarına gəlib.

CNN International-ın xəbərinə görə; Hindistan hökuməti açıqlamasında qiymətləri nəzarətdə saxlamaq üçün sentyabr ayına qədər davam edəcək marketinq mövsümü üçün şəkər ixracını 10 milyon tonla məhdudlaşdıracağını bildirib.

Ölkədəki satıcılardan 1 iyun - 31 oktyabr tarixləri arasında istənilən şəkər ixracı üçün səlahiyyətli orqanlardan "xüsusi icazə" almaları istənilib.

Hindistan dünyanın ən böyük şəkər istehsalçısı və Braziliyadan sonra ikinci ən böyük ixracatçısıdır.

İxracın məhdudlaşdırılmasına dair addım Asiyanın üçüncü ən böyük iqtisadiyyatında illik pərakəndə inflyasiyanın aprel ayında 7,8%-ə çatdığı bir vaxta təsadüf edir ki, bu da təxminən səkkiz ilin ən yüksək səviyyəsidir.

Cari marketinq ilində 2021-ci ilin oktyabrından 2022-ci ilin sentyabrına qədər Hindistan şəkər zavodları bu günə qədər təxminən 9 milyon ton ixrac müqaviləsi imzalayıb.