Moldovanın hazırkı Prezidenti Maya Sandu prezident seçkilərinin ikinci turunda qalib gəldiyini elan edib.

QÜTB.AZ xəbər verir ki, o, "X" sosial şəbəkəsində müvafiq yazı dərc edib.

“Moldova, bu gün qalib gəldin. Biz birlikdə birliyimizin gücünü, demokratiyamızı və layiqli gələcəyə sadiqliyimizi nümayiş etdirdik”, - deyə siyasətçi yazıb.

O, respublika vətəndaşlarına da minnətdarlığını bildirib.

Moldova Mərkəzi Seçki Komissiyasının ( MSK ) məlumatına görə , protokolların 98%-ni işlədikdən sonra Sandu 54,43%, ölkənin keçmiş baş prokuroru, müxalifətçi Sosialistlər Partiyasının namizədi Aleksandr Stoyanoqlo isə 45,57% səs toplayıb.

Xatırladaq ki, noyabrın 3-də Moldovada prezident seçkilərinin ikinci turu keçirilib . Moldova Mərkəzi Seçki Komissiyası seçicilərin 20%-i ötdüyü üçün ölkədə prezident seçkilərinin ikinci turunu baş tutmuş hesab edib.

Oktyabrın 20-də keçirilən seçkilərin birinci turunda Sandu 42,49%, Stoyanoqlo isə 25,95% səs toplayıb.

Hüseyn İbadlı