Bu yay diqqətlər Almaniyada keçiriləcək futbol üzrə Avropa çempionatına yönələcək. Qitə birinciliyi iyunun 14-də başlayacaq və düz bir ay davam edəcək. Final görüşü iyulun 14-də keçiriləcək. Turnirin oyunları cəmi 10 şəhər və arenada təşkil ediləcək.

Hansı şəhərlər və stadionlar Avropanın ən güclü 24 milli komandasını qəbul edəcək? Gəlin Almaniyaya virtual səfərə gedək.

Münhen Arena

Avro 2024-ə ev sahibliyi edəcək stadionlardan birincisidir. Turnirin açılış matçı məhz Münhendəki arenada, “Bayern”in ev oyunlarını keçirdiyi idman qurğusunda baş tutacaq.

Təəccüblüdür ki, bu stadionun o qədər də böyük tarixi yoxdur. 2005-ci ildə istifadəyə verilib. “Bayern” və “Münhen 1860” klubları birlikdə inşa etsələr də, arena indi tamamilə “pivəçilər”ə məxsusdur.

Bu stadionda 2012-ci ildə Çempionlar Liqasının finalı baş tutub. “Çelsi” sensasiyalı şəkildə “Bayern”i məğlub edərək turnirin qalibi olub. Bu, Almaniya nəhəngi üçün uğursuz ev finalı kimi tarixə düşüb.

Folksparkştadion

Bu arena Hamburqda yerləşir. 49 min tamaşaçı tutumuna malikdir. Nəhəng stadion olmasına rəğmən, buradan istifadə edən Almaniyanın köklü klublarından olan “Hamburq” İkinci Bundesliqada çıxış edir.

Komanda çətin günlər yaşayır. Bir neçə il əvvəl onlar tarixlərində ilk dəfə Bundesliqanı tərk ediblər. İndi ümidsiz şəkildə geri qayıtmağa çalışırlar.

Bu arena 2010-cu ildə Avropa Liqasının finalına ev sahibliyi edib. “Atletiko” həlledici görüşdə “Fulhem”i məğlub edərək titula sahib çıxıb. “Hamburq” bu finalın iştirakçısı ola bilərdi. Lakin komanda yarımfinalda mübarizəni dayandırıb.

Şəhərə gəlincə, Hamburq Avropa paytaxtlarını nəzərə almasaq, köhnə qitənin üçüncü ən böyük şəhəridir. Bu o deməkdir ki, futbol azarkeşləri burada darıxmayacaqlar. Hamburq dünyanın məşhur şəhərlərindən biri olmaqla yanaşı, limanıyla da ad çıxarıb.

Ştuttqart Arena

Ştuttqart ilk növbədə öz futbol komandası ilə deyil, qərargahı burada yerləşən avtomobil istehsalçısı olan “Mersedes” ilə məşhurdur. Turistlər səfər zamanı şəhərin və ümumilikdə Almaniyanın avtomobil tarixinə qərq ola bilərlər. “Porşe”nin istehsal müəssisəsi də orada yerləşir.

“Ştutqart”ın stadionunun çox qədim tarixi var. Arena 1933-cü ildə istifadəyə verilib. İdman qurğusu dəfələrlə avrokubok matçlarını, Avropa və dünya çempionatlarının final mərhələsinin oyunlarını qəbul edib.

Feltins-Arena

Bu, müasir və göstərişli stadiondur. Helsenkirhendə yerləşən qurğu nisbətən yenidir və 50 min tamaşaçı tutumuna malikdir. Həmçinin geri çəkilə bilən meydançası və bağlanan dam örtüyü var.

Bu səbəbdən stadion təkcə futbol məqsədləri üçün istifadə edilmir. Burada reqbi və basketbolla da kifayətlənmirlər. Arena biatlon və başqa fərqli idman növləri üzrə yarışları qəbul edir.

Hər il biatlon üzrə Milad yarışı sözügedən stadionda keçirilir. Trek birbaşa meydanın içindən salınıb. Tamaşaçılar turniri birbaşa tribunadan izləyə bilirlər. Arenada iri monitorlar da var ki, bu da yarışların gedişini nəzərdən keçirməyə kömək edir.

Rayn-Energi (Köln)

Bura gələcək turistlər ilk növbədə Köln kafedralı ilə maraqlanacaqlar. Bu, Almaniyada ən çox ziyarət edilən yerlərdən biridir. Kölndə ümumiyyətlə görmək üçün çox yer var. Çünki şəhərin iki min ildən çox yaşı var.

Stadiona gəlincə, yerli “Köln” klubuna məxsusdur. Bu, turnirin ən kiçik arenalarından biridir. Lakin 43 minə qədər tamaşaçı qəbul edə bilir. Burada müntəzəm olaraq hokkey və amerikan futbolu oyunları keçirilir, konsertlər təşkil olunur. Yeri gəlmişkən, qadınlar arasında Almaniya kubokunun finalı “Rayn-Energi”də baş tutur.

Siqnal İduna Park

“Borussia Dortmund”un ev oyunlarını keçirdiyi stadionunun yəqin ki, heç bir təqdimata ehtiyacı yoxdur. Arena Almaniyanın ən böyük idman qurğularından biridir və 62 min tamaşaçı tutumuna malikdir.

Turislər Dortmundda da darıxmayacaqlar. Şəhər regionun mədəniyyət paytaxtıdır. Burada futbol da çox populyardır. Alman Futbol Tarixi Muzeyini ziyarət etmək mütləqdir.

Esprit Arena

Bu, sahibi Bundesliqada oynamayan başqa bir stadiondur. Düzdür, “Hamburq” və “Şalke”dən fərqli olaraq, “Fortuna Düsseldorf” son vaxtlarda Bundesliqada çıxış etməyib. Klubun qızıl dövrü ötən əsrin 70-80-ci illərinə təsadüf edib. İki dəfə Almaniya və üç dəfə isə İntertoto kubokunun qalibi olub.

Ümumiyyətlə, Düsseldorf Şimali Reyn-Vestfaliyan vilayətinin paytaxtıdır. Şəhərdə memarlığı və gəzintiləri sevənlər üçün çox yer var.

Red Bul-Arena

“Leypsiq”in ev oyunlarını keçirdiyi stadion 40 min tamaşaçı tutumuna malikdir. Bu, Avro-2024-ü qəbul edəcək arenalar arasında Şərqi Almaniyada yerləşən yeganə idman qurğusudur.

Almaniyada “Leypsiq” o qədər də bəyənilmir. Klub rəhbərləri öz maraqlarına görə hər bir qanuni boşluqdan istifadə ediblər. Texniki cəhətdən “buğalar” səhmlərin 50+1%-nin azarkeşlərə məxsus olması qaydasına riayət edir. Rəsmi addakı RB hərfləri heç də sponsor olan “Red Bull” demək deyil. “RasenBall” topla ot üzərində oynanılan oyun mənasını verir.

Bununla belə, komanda çox sürətlə Bundesliqaya yüksəlib və Almaniya ilə yanaşı, Avropa futbolunun nəhəngləri siyahısına daxil olub. İndi komandanın bütün dünyada minlərlə azarkeşi var.

Əgər Leypsiqdəsinizsə, Leypsiq Sərgisinə mütləq baxın. Bu, Avropanın ən qədim sərgi yarmarkalarından biridir. Onun kökləri orta əsrlərə gedib çıxır. Dünya şöhrətli musiqiçi və bəstəkar İohan Sebastyan Bax bir vaxtlar burada yaşayıb. Onun məzarı burada qorunub saxlanılır. Tarixə nəzər salmaq üçün bu fürsəti əldən vermək olmaz.

Kommersbank-Arena

Almaniyada iki Frankfurt var. Bizə lazım olan “Frankfurt am Mayn” adlanır. Frankfurt an der Oder də var. Ora getsəniz, şəhərləri səhv salmamağa çalışın.

Frankfurt am Mayn Almaniyanın beşinci ən böyük şəhəridir. İnsanlar buranın Amerika metropoluna, daha çox Nyu-Yorka bənzədiyini deyirlər. Göydələnlər və müasir memarlıq səbəbindən oranı hətta zarafatla “Minekraft” da adlandırırlar.

İndi Frankfurt dünyanın ən böyük maliyyə mərkəzlərindən biridir. Bütün texnologiyaya baxmayaraq, mükəmməl qorunan köhnə şəhər də var. Buna görə də mütləq görməli olduğunuz bir yerlər var.

Yerli “Ayntraxt Frankfurt” son vaxtlar çox uğurlu çıxış edir. 2022-ci ildə Avropa Liqasının finalında komanda “Reyncers”ə qalib gəlib. “Qartallar” 2018-ci ildə Almaniya kubokunu da qazanıb, ötən mövsüm isə finalçı olub.

Yeri gəlmişkən, “Ayntraxt” “yekdillik” və ya “razılıq” kimi tərcümə olunur. Kobud desək, bu, “yunayted”in alman versiyasıdır. Buna görə də britaniyalılar komandanı “Frankfurt Yunayted” adlandıra bilərlər. Prinsipcə, haqlı sayılacaqlar.

Berlin Olimpiya Stadionu

Bu böyük və qədim idman qurğusu “Herta”nın ev oyunlarını keçirdiyi stadiondur. Hər il Almaniya Kubokunun finalına ev sahibliyi edir.

Məhz bu stadionda İtaliya və Fransa milli komandaları arasında 2006-cı il dünya çempionatının finalı baş tutub. Əfsanə Zinəddin Zidan məhz bu arenada Marko Materatsiyə kəllə ataraq tarixə düşüb. O, futbol karyerasına məhz Berlin Olimpiya Stadionunda baş tutan həmin görüşlə nöqtə qoyub.

Arenadan istifadə edən “Herta” da Almaniyanın ən qədim klublarından biridir. Bununla belə, yanlış qərarlar və klubun zəif idarə olunması komandanın ötən mövsüm Bundesliqadan düşməsinə səbəb olub.

İyulun 14-də Avro-2024-ün finalı məhz burada baş tutacaq. Olimpiaştadion 71 min tamaşaçı qəbul etmək iqtidarındadır.

Heybət Məmmədov