Böyük Britaniyada 1927-ci ildə 327,97 km/saata çatan ilk yerüstü sürət rekordu qıran “Sunbeam” avtomobilini bərpa etməyi planlaşdırırlar.
Publika.az xəbər verir ki, yanvarın 27-də Böyük Britaniyanın Bevley şəhərində yerləşən və hazırda “Sunbeam”ın yerləşdiyi Milli Motor Muzeyində layihə üçün vəsait toplanacaq.
Avtomobil 1926-cı ildə “Automobiles Talbot-Darracq” mühəndisləri tərəfindən Lui Kotalenin rəhbərliyi altında Cek İrvinqin iştirakı ilə hazırlanıb.
Avtomobil 22,4 litr həcmli və hər birinin gücü 435 at gücü olan bir cüt “Sunbeam Matabele” təyyarə mühərriki ilə təchiz edilib. Bir mühərrik öndə, digəri arxada yerləşir.
“Sunbeam” Daytona çimərliyində sürət rekordu yarışında iştirak edən ilk qeyri-Amerika avtomobili olub. 29 mart 1927-ci ildə bu avtomobili idarə edən Henri Siqreyv əvvəlki nailiyyəti (281,44 km/saat) əhəmiyyətli dərəcədə üstələyərək 327,97 km/saatla quruda sürət rekordu qırıb.
Rekordun 100 illiyində – 2027-ci ildə Daytona gətirmək üçün avtomobili və orijinal mühərrikləri bərpa etmək planları davam edir. Gələcəkdə bu avtomobilin muzeylərdə, məktəblərdə və universitetlərdə sərgilənməsi planlaşdırılır.
