Türkiyənin dövlət bankları Rusiya Federasiyası vətəndaşları üçün hesablar açmağa davam edir. Şərtlər yaşayış icazəsi və işləmək hüququnun olmasıdır.

Publika.az xəbər verir ki, bu barədə “Ziraat” dövlət bankının Ankaradakı filialının nümayəndəsi “RİA Novosti”yə bildirib.

Daha əvvəl Rusiya KİV-i Türkiyənin özəl bankı “Denizbank”ın rusiyalı müştərilərdən Türkiyədə yaşamaq icazəsini təsdiq edən sənədləri tələb etməyə başladığı barədə məlumat yayıb. Bank bu tələbin ABŞ-ın sanksiyalar siyasəti ilə deyil, daxili prosedurlarla bağlı olduğunu bildirib.

"Rusiya vətəndaşları üçün hesablar açılır. Şərtlər yaşayış icazəsi, işləmək hüququ və ya tələbə vizasının olmasıdır", - “Ziraat” filialının nümayəndəsi bildirib.

Onun sözlərinə görə, Türkiyə dövlət banklarına ruslara hesab açılmasına qadağa qoyulması ilə bağlı heç bir bildiriş daxil olmayıb.

Yanvarın 1-dən türk ixracatçıları bankların Rusiyadan pul köçürmələrini qəbul etməkdən imtinaları ilə üzləşib. Agentliyin mənbəsinin sözlərinə görə, problem qismən ABŞ-ın sanksiyalarla bağlı Türkiyəyə təzyiqi ilə bağlıdır.

Türkiyənin Ticarət Nazirliyi məsələni öz üzərinə götürüb və Moskva Ankara ilə dialoq aparır.

Tural