Dünyanın ən böyük kruiz gəmisi "Royal Caribbean International" gəmiçilik şirkətinə məxsus "Dənizlərin İkonu" təxminən 8 min sərnişinlə ABŞ-ın Mayami şəhərindən Karib hövzəsinə yola düşüb.

Publika.az xəbər verir ki, 365 metrlik gəmidə dünyanın ən böyük akvaparkı, həmçinin 40 bar-restoran, 15 metrlik şəlalə, mini qolf meydançası və buz meydançası var. 20 göyərtəli gəmi 7600 sərnişin və 2350 ekipajı daşıya bilir.

250 min ton ağırlığında olan nəhəng gəmi əfsanəvi "Titanik"dən 5 dəfə böyükdür. "Dənizlərin ikonası" 1,5 milyard funta başa gəlib. Şirkətin rəsmi saytındakı qiymətlərə görə, nəhəng gəminin ilk səyahəti olan 7 gecəlik Qərbi Karib turu 3 min 100, 7 gecəlik Şərqi Karib turu isə 2 min dollara başa gəlir. Digər tərəfdən nəhəng gəminin 6 mühərrikinin mayeləşdirilmiş təbii qazla (LNG) işləmək üçün nəzərdə tutulması ekoloqların reaksiyasına səbəb olub.

Şirkət LNG-nin dizel yanacağından daha ekoloji cəhətdən təmiz olduğunu iddia etsə də, LNG-dən istifadə nəticəsində yaranan metan emissiyalarının qlobal istiləşməyə karbon qazından çox daha çox təsir etdiyi bildirilir.

Aysel Şahmar