“Qarabağı düşmən tapdağından azad edəndə o da bizimlə idi. Onun “Laçınım mənim” fəryadının təsiri ilə silaha sarıldıq, o mahnıyla vuruşduq, o mahnıyla qalib gəldik”.

Publika.az xəbər verir ki, bu sözləri əməkdar artist Məhəbbət Kazımovun Laçında keçirilən xatirə gecəsində Vətən müharibəsinin könüllü iştirakçısı, doktor Tural Xaspolad deyib.

O bildirib ki, bizim müqəddəs zəfərimizdə musiqinin izaholunmaz təsiri var:

“Vətən həsrətilə oxunan nəğmələr də müharibədə döyüşüb, o mahnıları oxuyan sənətkarlar da”.

Turalın döyüş zamanı çəkdiyi nadir kadrlar bütün tamaşaçıları həyəcanlandırıb.

Laçının Həkəri bulvarında açıq səma altında baş tutan ədəbi-bədii gecədə mərhum müğənninin musiqiləri sərasər səslənib. Məhəbbət Kazımovun Azərbaycan Televiziyasının arxivində saxlanılan nadir müsahibələri, süni intellektlə yaradılan obrazı, məşhur mahnıların remiksləri, müasir aranjemanları, onun öz ifaları, həmçinin sənət dostlarının söylədikləri xatirələrdən ibarət 4 saatlıq şeir-sənət bayramı bir göz qırpımında keçib.

Azərbaycan Prezidentinin Laçın nümayəndəliyinin təşəbbüsü və Bakı Abadlıq Xidmətinin təşkilatçılığı ilə keçirilən gecə minə qədər tamaşaçının böyük sevgisi və coşqusu ilə müşayiət olunub. Bu, Məhəbbət Kazımov mahnılarının təntənəsi idi.