Tanınmış aktyor Hikmət Rəhimov "Apatiya" adlı filmi ilə tamaşaçıların görüşünə gəlməyə hazırlaşır.

Publika.az xəbər verir ki, bu barədə sənətçi özü məlumat verib. O, bildirib ki, sözügedən dram janrında çəkilən ekran əsərinin həm ssenarisini özü yazıb, həm də rejissoruluğunu özü həyata keçirib.

"Sizinlə mühüm bir xəbəri bölüşmək istədim. Bu, mənim rejissor kimi sayca ikinci tammetrajlı filmimdir. Filmin təqdimatı 9 fevral, saat 19:30-da "Flame Towers"də baş tutacaq. Film 9 fevraldan etibarən bütün kinoteatrlarda nümayiş olunacaq. Bu işin ərsəyə gəlməsində, yanımda olan və mənə dəstək olan insanların ad və soyadları filmin sonunda qeyd olunduğuna görə, burada uzun-uzadı yazmaq istəmədim", - Hikmət Rəhimov sonda vurğulayıb.

Layihədə baş rollarda Tural Baxış, Şəhla Əliqızı, Fuad Cəbiyev, Məhəmməd Şahməmmədli, Azər Aydəmir, Elşən Əsgərov və başqaları yer alıb.

Filmin posterlərində yaş həddinin +18 olduğu qeyd olunub.

Film haqqında təəssüratlarını bölüşən Tural Baxış qeyd edib ki, sevgisiz, ruhsuz, həyata qarşı bütün marağı, hissləri ölmüş bir ailə başçısını canlandırıb.

"Aktyor kimi gördüyü işlərdə həmişə istedadı ilə fərqlənən Hikmət Rəhimov artıq ikinci dəfədir ki, özünü tammetrajlı bədii filmdə sınayır. İlk filminin gətirdiyi uğurdan yəqin ki, çoxlarının xəbəri var. Bu yaxınlarda isə həm ssenari müəllifliyini, həm də rejissorluğunu etdiyi "Apatiya" filminin premyerası olacaq. Uzun fasilədən sonra çəkildiyim bu filmdə sevgisiz, ruhsuz, həyata qarşı bütün marağı, hissləri ölmüş bir ailə başçısını canlandırmağa çalışmışam. Film, cəmiyyətin və insanların bir fərdi necə vəhşiyə çevirməyindən bəhs edir. "Nə dərəcədə alınıb?" sualına isə ən doğru cavabı əlbəttə ki tamaşaçılar verəcək. Filmin bütün yaradıcı heyyətinə bol-bol uğurlar arzulayıram", - Tural Baxış vurğulayıb.

Məlumat üçün bildirək ki, ikinici hissəsi səbirsizliklə gözlənilən "Əqrəb mövsümü"ndə baş rollardan birini canlandıran Hikmət Rəhimovun layihədə yer almayıb.