Türkiyə polisi Elazığda dilənçilərə qarşı əməliyyat keçirib. Əməliyyat çərçivəsində bir dilənçinin gün ərzində qazandığı pulun miqdarı eşidənlərin heyrətinə səbəb olub.

Publika.az xəbər verir ki, bu barədə Elazığ Bələdiyyəsi Təhlükəsizlik Müdiri Kadir Temur məlumat verib.

Bildirilir ki, aparılan araşdırmalar çərçivəsində xüsusilə məscidlərin qarşısı və insanların tez-tez istifadə etdiyi ərazilərə üstünlük verən dilənçilər bir-bir yaxalanıb. Həmin şəxslər barəsində inzibati xəta haqqında protokol tərtib edilib.

Axtarışlar zamanı yalnız bir dilənçinin üzərindən 10 min 780 lirə (təxminən 554 manat ) tapılıb. Bununla da Türkiyədə minimum əməkhaqqı ilə işləyən vətəndaşın 1 ayda qazandığı qədər pulu dilənçilər bir gündə qazanır.

İnsanların dini hisslərini istismar etməklə gəlir əldə edənlərə qarşı tədbirlərin davam edəcəyi bildirilib. Həmçinin vətəndaşlardan belə insanlara yox, həqiqətən ehtiyacı olanlara kömək etmələri xahiş olunub.

Roza Şəfiyeva