Rusiyanın xarici işlər naziri Sergey Lavrov amerikalı jurnalist Taker Karlsona münaqişə başlamazdan əvvəl ABŞ dövlət katibi Entoni Blinkenlə Ukrayna ilə bağlı əvvəllər məlum olmayan söhbəti haqda danışıb.

QÜTB.AZ xəbər verir ki, jurnalistin şəxsi saytında Rusiya Xarici İşlər Nazirliyinin rəhbəri ilə müsahibə dərc olunub.

Lavrov ABŞ dövlət katibini uzun müddətdir görmədiyini və son görüşlərinin 2021-ci ildə İtaliyada keçirilən G20 sammiti çərçivəsində baş tutduğunu bildirib.

“Blinkenin köməkçisi görüş zamanı yanıma gəldi və on dəqiqə danışmaq istədiyini söylədi. Otaqdan çıxdım. Əl sıxdıq. O, deeskalasiyanın zəruriliyi ilə bağlı nəsə dedi”, - nazir bildirib.

O, Blinkenə deyib ki, Rusiya eskalasiyanı istəmir, ABŞ isə onu strateji cəhətdən məğlub etmək istəyir. Eyni zamanda ABŞ dövlət katibi ona bildirib ki, bu, qlobal miqyasda strateji məğlubiyyət deyil, yalnız Ukraynadadır.

Lavrov ABŞ Dövlət Departamentinin katibinin bu məlumatı açıqlamasına görə ona “qəzəblənməyəcəyinə” ümid etdiyini bildirib.

Oktyabr ayında Blinken Lavrovun Laosda keçirilən Şərqi Asiya Sammitində çıxışı zamanı iştirak etdiyini bildirmişdi. Onun sözlərinə görə, tərəflər “bir-birini dinləyib”.

Hüseyn İbadlı