Mənim taleyimə acıma, gülüm
Yəqin bu ömrü mən yaşamalıydım.
Gəmiydim, görünməz oldu sahilim,
Yəqin bu ömrü mən yaşamalıydım
Azərbaycan ədəbiyyatının ən görkəmli qadın şairələrindən biri, Cənub mövzusunda unudulmaz poeziya nümunələrinə həyat verən, dillər əzəbri edən, Əməkdar İncəsənət Xadimi Mədinə Gülgünün bu gün doğum günüdür.
Publika.az bu yazı ilə ürəklərdə əbədi taxt quran Mədinə Gülgünü 98 –ci ildönümündə yad edir.
Sevgidə sədaqət, əhdə vəfa, həyat eşqi, insanın ucalığı, ana-qadın qəlbinin ən gözəl təzahürü olan övlad məhəbbəti, sülh, əmin-amanlıq arzuları, vətəni qorumaq, doğma təbiətə heyran olmaq, gözəllik duyğusu və bütün bunları özündə bötövləşdirən, birləşdirən Mədinə Gülgün... Coşqun, kövrək, həssas ruhlu şairə... Onun qəlbində vətən həsrəti, analıq duyğuları, mübarizə eşqi hər zaman böyük bir vəhdət təşkil edib. Şeirlərindəki səmimilik bunun bariz nümunəsidir.
Bir körpə quş görsəm açıbdır qanad,
Onundur, elə bil, bütün kainat.
Könlümdə başlanır sanki toy-büsat,
Mən susa bilmirəm, susa bilmirəm.
Onun ilk yaradıcılıq nümunələri Azərbaycan xalqının azadlıq və milli istiqlaliyyət uğrunda apardığı mübarizə illərinə təsadüf edib. Mədinə Gülgünün poeziyası xalqa, doğma vətənə övlad məhəbbətində yoğurulub, oxucularını ağ günlərə və qurtuluş uğrunda döyüşlərə çağırış ruhunda köklənib.
Şairənin əsərləri hələ sağlığında bir sıra xarici dillərə tərcümə olunub. Dünya xalqlarının azadlıq və istiqlaliyyət uğrunda mübarizəsini bir humanist şair kimi daim izləyən, kəsərli sözləri ilə onların səsinə səs verən şairin Bakıda və Moskvada “Təbrizin baharı”, “Savalanın ətəklərində”, “Sülhün səsi”, “Yadigar üzük”, “Təbriz qızı”, “Firudin”, “Dünyamızın sabahı”, “Durnalar qayıdanda”, “Dünya şirin dünyadır”, “Çinar olaydı”, “Arzu bir ömürdür”, “Yora bilməz yollar məni”, “Könlümü ümidlər yaşadır” və onlarca digər şeir kitabları dərc olunub. Onun lirik şeirlərinə mahnılar bəstələnib.
Sən dünyanı dolan, gəz
Bu dünyaya inan, gəz.
Bir toxum da cücərməz,
Məhəbbət olmayanda....
“Şeirdi həyatda sərvətim mənim” deyən şairənin yazdığı bu kitabların başlıca mövzusu insan taleyi, azadlıq hissi, Təbriz həsrəti, övladlarını qəlbdən sevən bir ana qəlbinin arzu və istəkləridir. Qəlbi Cənub həsrəti ilə döyünən Xalq şairi Balaş Azəroğlu ilə ailə həyatı quran Mədinə Gülgün bir şair ömrünü şərəflə, vicdanla yaşaya bildi. Elə bu dünyaya gəlişi kimi, gedişi də qışa təsadüf etdi... Mədinə Gülgün 1991-ci il fevralın 17-də dünyasını dəyişib, Fəxri xiyabanda dəfn olunub.
Qalır nişanımız, izimiz bizim,
İzi olmayanlar heç yoxmuş demək.
Qalır ocağımız, közümüz bizim,
Yanan çırağımız bil, sönməyəcək.
Şeri həyatının sərvəti hesab edən, ürəyi o taylı-bu taylı Azərbaycanla döyünən Mədinə Gülgünün misraları da adı kimi, özü kimi həmişə yaddaşlarda qalacaq, zaman-zaman dildən-dilə, ürəkdən ürəyə yol tapmaqda davam edəcək. Mədinə Gülgün özü kimi, sözü kimi, izi kimi...
Cəmilə Hətəmxanova
