Məhkəmə Ankara sakinini şəxsi gigiyena qaydalarına riayət etmədiyinə görə həyat yoldaşına 16500 dollar məbləğində təzminat ödəməyə məcbur edib.

Publika.az xəbər verir ki, bu barədə “Haber” portalı məlumat yayıb .

“Məhkəmə əri təqsirli bilib, boşanma qərarı verib və 500 min türk lirəsi (16,5 min dollar) məbləğində təzminat təyin edib”, – məlumatda bildirilir.

Paytaxt sakininin şikayəti ilə bağlı Ankarada keçirilən məhkəmə prosesi sosial şəbəkələrdə böyük maraq və müzakirələrə səbəb olub. Belə ki, qadın ərinin həftədə 1-2 dəfə dişlərini fırçaladığını və şəxsi gigiyenasına əhəmiyyət vermədiyini əsas gətirərək boşanma ərizəsi verib. Məsələ ilə bağlı istifadəçilərin fikirləri birmənalı olmayıb.

Yerli telekanallardan biri abunəçilərə sosial problemlərlə bağlı verilişin növbəti buraxılışında mövzunu müzakirə edəcəklərini vəd edib.