İtaliyanın Milan şəhərində bələdiyyə hökumətinin şəhərdə gecə həyatını qaydasına salmaq istiqamətində həyata keçirdiyi tədbirlər çərçivəsində təxminən bir aya yaxın şüşə və qalay paketlərində içki satışına qadağa qoyulub.

Publika.az xəbər verir ki, İtaliya mediasında yayılan xəbərlərə görə, ölkənin ən çox ziyarət edilən şəhərlərindən biri olan Milanın meri Cüzeppe Sala şəhərin turistik məkanlarında gecə saatlarında çöldə içki satışı ilə bağlı yeni qərar imzalayıb.

Şəhərdə bu gündən iyunun 1-dək sınanacaq təcrübə çərçivəsində Duomo meydanı, Navigli, Bicocca Darsena kimi 12 turistik ərazidə saat 22.00-dan 05.00-dək şüşə və qalay bağlamalarda alkoqol və ya sərinləşdirici içkilərin satışına icazə verilməyəcək.

Qadağa bütün kiçik, orta və iri satış yerlərini və belə paketlərdə məhsul satan avtomatik qurğuları əhatə edir. Digər tərəfdən, məkanlarda xidmətlərə məhdudiyyət qoyulmasa da, çöldə göstəriləcək xidmətlərdə karton fincanlardan istifadə edilməsi tələb olunur.

Mətbuatda çıxan xəbərlərdə şüşə butulkaların qırılmasının həm səs-küyə, həm də müxtəlif təhlükəli xəsarətlərə səbəb olduğu bildirilib.

Roza Şəfiyeva