Qırğızıstan prezidenti ölkənin cənubunda baş verən daşqınlar zamanı dövlət helikopterindən istifadə edərək sevgilisinə evlilik təklifi edən şəxslə bağlı qərar verib.

Publika.az xəbər verir ki, Aftandil Sabırbekov adlı həmin şəxs prezident Sadir Caparovun bacısı qızı, gözəllik kraliçası Ləzzat Nurqojoyevaya dəbdəbəli şəkildə evlilik təklifi edib.

Bunun üçün Qırğızıstan Fövqəladə Hallar Nazirliyinə məxsus helikopterdən istifadə edilib. Qısa zamanda gündəm olan görüntülər hakimiyyətə gəldikdən bəri siyasətçiləri insanların pullarını israf etməsinə görə tənqid edən Caparovu qəzəbləndirib.

“Bacım qızına görə ictimaiyyətdən üzr istəyirəm. Sabirbekov bacım qızını sevmir, onunla yalnız özünə siyasi dəstək qazanmaq və qanunsuz əməllərini gizlətmək üçün evlənmək istəyir”, - prezident bildirib.

Hadisədən iki həftə sonra Caparov onun həbsinə göstəriş verib. Yerli mətbuata görə, Sabirbekov narkotik cinayətləri səbəbilə həbs edilib.

Qeyd edək ki, Qırğızıstanda baş verən daşqınlar nəticəsində 6 ayda 22 nəfərin öldüyü, 4 min 551 şəxsin evinə ziyan dəydiyi bildirilib.

Roza Şəfiyeva