Rusiya payız çağırışı çərçivəsində hərbi xidmətdən möhlət üçün informasiya texnologiyaları mütəxəssislərinin ərizələrini qəbul etməyə başlayıb.

Publika.az “Regnum”a istinadən xəbər verir ki, ərizələr avqustun 6-dək Dövlət Xidmətləri portalından istifadə etməklə verilə bilər.

Qeyd olunub ki, işəgötürən məlumatları təsdiqləməli və sonra avqustun 11-dək Rusiya Rəqəmsal İnkişaf Nazirliyinə göndərməlidir. Şirkət müstəqil olaraq işçiləri möhlət siyahısına əlavə edə bilər.

Bildirilib ki, 18-30 yaş arası şəxslər siyahıya daxil olmaq üçün mütləq Rusiya vətəndaşlığına malik olmalıdırlar. Bundan başqa, mütəxəssis hərbi xidmətə çağırışın başlama tarixindən əvvəlki il ərzində ən azı 11 ay akkreditə olunmuş informasiya texnologiyaları şirkətlərində əmək müqaviləsi əsasında işləməli, şirkət 11 avqust 2024-cü il tarixinədək akkreditasiyadan keçməlidir.

"İş təcrübəsi universiteti bitirdikdən sonra bir il ərzində işə düzələn tələbələrə şamil edilmir", - deyə Rusiya Rəqəmsal İnkişaf Nazirliyinin “Telegram” kanalında qeyd olunub.

Xatırladaq ki, Rusiya prezidenti Vladimir Putin ötən il sentyabrın 4-də informasiya texnologiyaları mütəxəssisləri üçün hərbi xidmətə çağırışdan möhlət yaş həddinin 27 yaşdan 30 yaşa qədər artırılması haqqında fərman imzalayıb.

Vazeh BƏHRAMOĞLU