Türkiyənin xarici işlər naziri Hakan Fidan Londonda keçirilən Ukrayna mövzusuna həsr olunmuş toplantıdan sonra jurnalistlərə açıqlama verib.

Qutb.az xəbər verir ki, o, ABŞ-ın son siyasi qərarlarının Avropalı liderlər arasında Ukrayna məsələsində və ümumilikdə Avropa təhlükəsizliyi baxımından suallar doğurduğunu vurğulayıb.

Fidan görüşün əsas müzakirə mövzusunun Ukraynadakı mümkün sülh razılaşması və atəşkəs olduğunu qeyd edib. O bildirib ki, bu məsələlər ətrafında fərqli baxışlar mövcuddur və Avropa İttifaqı daxilində də müzakirələr davam edir.

Türkiyənin həm Ukrayna böhranının həllində, həm də Avropanın təhlükəsizlik sisteminin yenidən qurulmasında mühüm rol oynadığını bildirən Fidan Rəcəb Tayyib Ərdoğanın bu istiqamətdə geniş baxışa sahib olduğunu deyib.

Avropa liderlərinin ABŞ-yə səfərlərindən sonra yenidən bir araya gəlib vəziyyəti dəyərləndirdiklərini bildirən nazir bu çərçivədə daha tez-tez toplantıların keçiriləcəyini qeyd edib.

“Görünən odur ki, bu görüşlər artıq altı ayda bir deyil, iki həftə və ya üç həftə aralıqlarla keçiriləcək,” – deyə Fidan bildirib.

Türkiyə XİN rəhbəri vurğulayıb ki, Ukraynadakı sülh razılaşması və Avropanın yeni təhlükəsizlik arxitekturasının formalaşıb-formalaşmayacağını zaman göstərəcək. O, dərhal atəşkəsin elan olunmasını və davamlı sülh prosesinin başlamasını ümid etdiklərini qeyd edib.

“Bu prosesi mümkün edəcək amillər nələrdir? Bu barədə müxtəlif ölkələrin fərqli baxışları var. Amma bizim prioritetimiz aydındır: Prezidentimizin də qeyd etdiyi kimi, barışın itirəni olmaz. Ona görə də sülh üçün indidən hazırlıq görməliyik,” – deyə Fidan əlavə edib.