Yunanıstanda dövlət qulluqçularının 24 saatlıq tətilə çıxması ölkədə gərginlik yaradıb.
Publika.az Anadolu Agentliyinə istinadən xəbər verir ki, paytaxt Afinada işçilər, məmurlar və tələbələr etiraz aksiyası təşkil ediblər. Dövlət Qulluqçuları Həmkarlar İttifaqı Konfederasiyasının (ADEDY) çağırdığı 24 saatlıq tətili Mübarizə Əmək Cəbhəsi Birliyi (PAME) də dəstəkləyib.
İşçilərin iqtisadi şəraitinin yaxşılaşdırılması tələbi ilə təşkil edilən tətilin dünən keçirilməsi təsadüfi deyil. Belə ki, Larisa yaxınlığındakı Tempi ərazisində 57 nəfərin ölümü ilə nəticələnən qatar qəzası keçən il ötən il 28 Fevral tarixində baş vermişdi. Fəallar hökumətdən yaşayış minimumuna qarşı tədbirlər görməyi, maaşların artırılmasını və dövlət sektorunda kadrların sayını artırmağı tələb ediblər. Digər tərəfdən, fəallar ötən il fevralın 28-də Tempidə baş verən qatar qəzasına aydınlıq gətirilməsini və günahkarların cəzalandırılmasını da tələb ediblər. Bəzi nümayişçilər əllərində Fələstin bayraqları və “Fələstinə azadlıq” şüarları səsləndiriblər.
Afinada tətil səbəbilə taksi, metro və tramvay xidmətləri 24 saatlıq dayandırılıb. Qərara alınıb ki, avtobus və trolleybuslar yalnız müəyyən saatlarda fəaliyyət göstərsin. Dəniz nəqliyyatı da bir sutkalıq dayandırılıb. Tətil səbəbindən bir çox məktəblər də bağlanıb. Yunanıstan Polis Xidmətinin məlumatına görə, Afinada tətil çərçivəsində təşkil edilən aksiyaya 20 mindən çox adam qatılıb.
Aktivist Manos Andrulakis qeyd edib ki, Yunanıstan Müəllimlər Federasiyası da bu aksiyanı dəstəkləyir. "Tempi qatar qəzasının ört-basdır edilməməsi üçün mübarizə aparırıq. Xalqın maarifləndirilməsi üçün mübarizə aparırıq", - aktivist bildirib.
Afinada parlament binası qarşısında bir qrup fəalla polis arasında dava düşüb. Bəzi fəallar parlament binasının bağçasına “Molotov kokteyli” atıb, polis hadisəyə bibər qazı ilə müdaxilə edib. Saloniki, Patra, Volos və Xaniya kimi əyalətlərdə də etiraz aksiyaları keçirilib.
Fəallardan Takis Rubis Tempi faciəsinin qurbanları üçün ədalət tələb edib: "Hadisə tam aydınlaşsın. Bundan başqa. bu gün bütün cəmiyyətin yaşadığı yüksək qiymətlərə etiraz olaraq işçilər bura toplaşıb. Biz maaşlarımızla şərəfli bir həyat yaşamaq istəyirik. Qışqırmaq istəyirəm ki, daha dözməyə gücümüz yoxdur. Həll yolu olmalıdır. Bu problemlərin bir həll yolu tapılmalıdır".
Aytən
